II Nikolayın "kötücəsi" saxlanıldı: Görün nə tələb edirmiş

Moskvada özünü II Nikolayın kötücəsi adlandıran qadın yəhudilərə qarşı nifrət və düşmənçilik yaratmaqda şübhəli bilinərək saxlanılıb. 52 yaşlı Svetlana Vislobokova özünü tarixçi, professor və hətta qlobal siyasət üçün rus ziyalı lideri kimi təqdim edir.

Publika.az "Baza" Telegram kanalına istinadən xəbər verir ki, o, bir çox titul və rütbələrə sahib olduğunu, həmçinin psixi sağlamlıq və narkotik asılılığının olmaması haqqında sertifikata sahib olduğunu iddia edir.

Vislobokova Rusiya hakimiyyəti, yəhudilər və qlobal geosiyasət haqqında fəal şəkildə danışdığı "Telegram" kanalını idarə edir. Məlumata görə, onun həbsinə səbəb bu kanaldakı materiallar olub. Müstəntiqlər hesab edirlər ki, o, 2023-cü ilin avqustundan bəri ən azı səkkiz dəfə yəhudilərə və onların tərəfdarlarına qarşı zorakılığa çağırış edib. O, paylaşımlarında Rusiyanın tanınmış siyasətçiləri, idmançıları və mədəniyyət xadimlərinin ünvanına təhqiramiz ifadələr işlədib, onları “İsrail siçovulları” adlandırıb, əmlaklarından və mükafatlarından məhrum edilməsini tələb edib.

Qeyd edək ki, 2025-ci il martın 31-də Vislobokovaya qarşı nifrətin qızışdırılması və insan ləyaqətinin alçaldılması, habelə ekstremist fəaliyyətə ictimai çağırışlar üzrə cinayət işi açılıb. Məhkəmə həbs-qətimkan tədbirini yaxın vaxtlarda müəyyən edəcək.

Adəm Abbaslı