Məşhur jurnalistin meyiti zibil konteynerindən tapıldı

ABŞ-ın Las-Veqas şəhərində tanınmış jurnalist və frilans yazıçı Metyu Kelemanın meyiti zibil konteynerindən tapılıb.

Publika.az "The Guardian"a istinadən xəbər verir ki, hadisə şəhər sakinlərinin konteynerdən gələn kəskin qoxu ilə bağlı şikayətindən sonra üzə çıxıb.

Yerli polisin verdiyi məlumata görə, konteyner yoxlandıqda içəridə 56 yaşlı jurnalistin qalıqları aşkarlanıb.

Mərhumun bacısı bildirib ki, Keleman yaşadığı evi tərk etməyə hazırlaşırdı:

"Orada yaşamaq onun üçün çox çətin idi. Ev yoldaşını isə daim qəribə biri kimi təsvir edirdi", – deyə bacısı əlavə edib.

Hüquq-mühafizə orqanları ilkin araşdırmalardan sonra jurnalistin qətli ilə bağlı onun 63 yaşlı otaq yoldaşını şübhəli şəxs kimi müəyyənləşdirib. Lakin həmin şəxsin polis patrulunun təqibi zamanı baş verən yol-nəqliyyat qəzasında həyatını itirdiyi məlum olub. Qəzanın Kelemanın ölümü ilə birbaşa əlaqəsi olmadığı açıqlanıb.

Metyu Keleman 2003-cü ildən Las-Veqasda yaşayıb. O, “944” və “City Life” kimi jurnallarda mütəmadi yazılarla çıxış edib. Son 20 il ərzində isə “Las Vegas Weekly” başda olmaqla, müxtəlif nüfuzlu nəşrlər üçün film resenziyaları, reportajlar və məqalələr qələmə alıb.