Etimad İsmayılovun qatilinin yeri bilindi - Ev həbsindən yayınan Dəmirov görün hara gedib

"Etimadın qatili hazırda Belarusiyadadır".

Bu barədə Publika.az-a Ədalət Partiyasının sabiq sədri, mərhum İlyas İsmayılovun qardaşı oğlu Gündüz İsmayılov məlumat verib.

"Bir il öncə onkoloji xəstəliyinə görə ev dustaqlığına buraxılıb. O isə qanunsuz olaraq ölkəni tərk edib. Onun həyat yoldaşı belarusiyalıdır. Bildiyimizə görə, Gözəl Dəmirov da Belarusiyaya - həyat yoldaşının yanına gedib”, - deyə o bildirib.

G.İsmayılov G. Dəmirovun Etimad İsmayılovu qətlə yetirdiyinə görə 18 il həbs cəzası aldığını qeyd edib:

“O, çox nankor adamdır. Əmim oğlunu öldürməmişdən bir müddət öncə, borca görə onun öz ailə üzvlərini girov götürmüşdülər. Etimadın zəngi ilə ailəsi azadlığa buraxılmışdı. Məhkəmədə də rəhmətlik əmim (İlyas İsmayılov - red.) dedi ki, niyə belə etdin? Cavab verə bilmədi".

Qeyd edək ki, 2018-ci ildə Etimad İsmayılovu qətlə yetirən Gözəl Dəmirov onkoloji xəstəlikdən əziyyət çəkməsi səbəbilə Türkiyədə həbsxanadan azadlığa çıxıb. Amma o, azadlığa çıxdıqdan sonra ev həbsindən yayınaraq Türkiyəni tərk edib.

Türkiyədə qətlə yetirilmiş Etimad İsmayılov Ədalət Partiyasının sabiq sədri, mərhum İlyas İsmayılovun oğludur.