"Şükürova çatan pul şirinlik idi, onun rüşvət olduğunu bilməmişəm"

Səfərbərlik və Hərbi Xidmətə Çağırış üzrə Dövlət Xidməti Xəzər rayon idarəsinin rəisi Ramin Şükürov, həmin idarənin Çağırış şöbəsinin baş zabiti Xalid Əzimov və zabiti Emil Nəbiyevin barəsində cinayət işi üzrə məhkəmə prosesi keçirilib.

Publika.az Teleqraf-a istinadla xəbər verir ki, Bakı Hərbi Məhkəməsində hakim Fikrət Əliyevin sədrlik etdiyi prosesdə şahid qismində Ülfət Məmmədov ifadə verib.

O bildirib ki, Xəzər Tibb Mərkəzində stomotoloq-həkim işləyir: "Maya Qocayevanı tanıyıram. Onun oğlu Fuad Rüstəmovun 18 yaşı tamam olmuşdu, imtahan vermək üçün möhlət istəyirdi. Mənə bu barədə deyəndə imtahan vermək üçün müraciət etməli olduğunu, problemlə qarşılaşmayacağınıı dedim. Amma Maya xanım bildirdi ki, oğlunun 18 yaşı tamam olub, çağırış yaşda olduğu üçün Dövlət İmtahan Mərkəzi arayış tələb edir. İmtahana qatılması üçün hərbi komissarlıq "stop"u götürməlidir.

Maya xanım yanımda ağladı, mənim oğluna bir dayı kimi köməklik etməyimi istədi. Bununla bağlı Ramin müəllimə yaxınlaşdım, məsələni izah etdim. O da dedi ki, uşaq gəlsin, özünü görüm. Bunu Maya xanıma söylədim. Uşaq mənsiz Ramin müəllimin yanına getdi.

Bir neçə gün sonra Maya xanım məndən xahiş etdi ki, Ramin müəllimdən nə qərara gəldiyini öyrənim. Yenidən Ramin müəllimlə görüşdüm. O, məsələnin düzəlməsi üçün bir az xərc tələb olunduğunu dedi. Ona Maya xanımın 4 min manatı olduğunu, bundan yuxarı gücü çatmadığını söylədim. Mən bu məbləğdə pulu Maya xanımdan alaraq çatdırdım".

Dövlət ittihamçısı Orxan Kəngərlinin suallarını cavablandıran şahid qeyd edib ki, Ramin Şükürov ondan pulu şəxsən almayıb, 6-cı otağa verməyi tapşırıb. Onun sözlərinə görə, pulu qeyd olunan otaqda Xalid Əzizova verib.

Ramin Şükürovun vəkili Ceyhun Yusifovun suallarını cavablandıran şahid deyib ki, Şükürova çatmalı olan pul şirinlik olub, rüşvət olduğu bilməyib: "Pul olsaydı da, olmasaydı da Ramin müəllim bu işi görəcəkdi. Pulu şirinlik kimi vermişəm".

Vəkilin pulun şirinlik və ya rüşvət olması ilə bağlı digər suallarına dövlət ittihamçısı etiraz edib. Bildirib ki, şahid bunun şirinlik olduğunu deyir. Ceyhun Yusifov isə bildirib ki, şirniyyat ancaq kulinariyada olur.

İzahat verən Ramin Şükürov şahidin yalan danışdığını deyib.

Daha sonra şahidin ibtidai istintaq zamanı verdiyi ifadəsi elan edilib. O, həmin ifadəsində göstərib ki, Ramin Şükürov ona bu işlərin bəzən 6 minə, bəzən də 8 minə başa gəldiyini deyib: "Mən də dedim ki, Maya xanımın 4 min manatı var. 4 mini alaraq Ramin Şükürovun yanına gətirdim. O, pulu Xalid Əzizova verməyimi istədi. Mən də pulu ona verdim. Bildirdim ki, pulu say, götür. O, pulu sayıb götürdü. Bu işlərdən Xalidin də xəbəri olub".

Ülfət Məmmədov ifadəsinin təsdiqləyib. Bildirib ki, Ramin Şükürovla 6 min-8 min söhbəti olmayıb: "Bizim Ramin Şükürovla başqa işlə bağlı söhbətimiz olub. Mən məhkəmədə olan ifadəmi təsdiqləyirəm".

Növbəti proses oktyabrın 15-də davam edəcək.

İttihama görə, Ramin Şükürovun Səfərbərlik və Hərbi Xidmətə Çağırış üzrə Dövlət Xidmətinin Xəzər rayon idarəsinin rəisi vəzifəsində işləyərkən Xalid Əzimov və Emil Nəbiyevlə cinayət əlaqəsinə girib.

Onlar çağırışçıların dinc dövrdə hərbi xidmətə yararsız, müharibə dövründə qismən yararlı hesab edilmələri barədə hərbi biletin verilməsi və hərbi qeydiyyata alınma prosesinin sürətləndirilməsi müqabilində ayrı-ayrı şəxslərdən külli miqdarda pul vəsaitini təkrarən rüşvət qismində almalarına əsaslı şübhələr müəyyən edilib.

Bundan başqa, Ramin Şükürovun öz qulluq mövqeyindən istifadə etməklə qeyd olunan Xidmətin Nərimanov rayon idarəsində hərbi qeydiyyatda olan vətəndaş Natiq Soltanovun dinc dövrdə hərbi xidmətə yararsız, müharibə dövründə qismən yararlı hesab edilməsinə kömək olunması ilə bağlı ondan 30 min manat pul alıb. Eyni əməllərlə çağırışçılar - Anar Rzayevdən 6 min, Əhməd Əhmədovdan 22 min, Orxan Baxşıyevdın 2 min, Fuad Rüstəmovdan 4 min manat rüşvət alınıb.

Toplanmış sübutlar əsasında Ramin Şükürova Cinayət Məcəlləsinin 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrarən külli miqdarda rüşvət alma) və 312-1.1-ci (vəzifəli şəxsin qərarına qanunsuz təsir göstərmə (nüfuz alveri) maddələri ilə ittiham elan edilib.

Emil Nəbiyev və Xalid Əzimova isə Cinayət Məcəllənin 311.3.1 və 311.3.2-ci maddələri ilə ittiham elan olunub.

İstintaq dövründə Ramin Şükürovun barəsində həbs, Emil Nəbiyev və Xalid Əzimovun barəsində isə ev dustaqlığı növündə qətimkan tədbiri seçilib.

Daha sonra isə bu ilin sentyabrın 1-də Bakı Hərbi Məhkəməsi tərəfindən Ramin Şükürov ev dustaqlığına buraxılıb.