Gürcüstanda ruslara qarşı əməliyyat: Belə ifşa edildilər

Gürcüstanda yüz milyonlarla dollarlıq çirkli pulların yuyulmasında şübhəli bilinən beş Rusiya vətəndaşı saxlanılıb.

Publika.az xəbər verir ki, məlumatı Gürcüstan Maliyyə Nazirliyinin İstintaq Xidməti yayıb.

Araşdırmaya görə, saxlanılan şəxslər yeraltı kripto şirkəti vasitəsilə qanunsuz gəlirlərin leqallaşdırılması üçün irimiqyaslı maliyyə sxemi qurublar.

Rusiya vətəndaşlarının idarə etdiyi şirkətlərdən biri Gürcüstan Milli Bankının icazəsi olmadan virtual aktivlər üzrə xidmətlər göstərib, həmçinin qeyri-qanuni ofis və kuryer sistemi vasitəsilə əməliyyatlar həyata keçirib.

İstintaq müəyyən edib ki, onlar sərhəd nəzarətindən gizli şəkildə külli miqdarda xarici valyuta ölkəyə gətirib və bu vəsaitləri virtual aktivlər almaq üçün istifadə ediblər. Nəticədə “yüz milyonlarla lari” dövriyyəyə buraxılsa da, şirkət dövlət büdcəsinə heç bir vergi ödəməyib.

Tbilisidəki ofisdə aparılan axtarışlar zamanı kompüter avadanlıqları, sənədlər və 371 min dollar ələ keçirilib. Bundan başqa, şübhəlilərdən birindən 100 min dollar, Rusiya nömrəli avtomobildən isə 250 min dollar götürülüb.

Saxlanılan rusları 9 ildən 12 ilədək həbs cəzası gözləyir. Nazirlik təqsirləndirilənlərin sayının artması və ittihamların sərtləşdirilməsi ehtimalını da istisna etməyib.

Adəm