Azərbaycan beynəlxalq axtarışda olan şəxsləri Moldova və Çinə təhvil verdi

Azərbaycan beynəlxalq axtarışda olan şəxsləri Moldova və Çinə təhvil verib.

Publika.az xəbər verir ki, bu barədə Baş Prokurorluq məlumat yayıb.

Bildirilib ki, Moldovanın yol hərəkəti və nəqliyyat vasitələrinin istismarı qaydalarını pozmaqda təqsirləndirilərək beynəlxalq axtarışa verdiyi, 1991-ci il təvəllüdlü Özbəkistan vətəndaşı Firuz Farxodoviç Rustamov və Çinin qanunsuz sahibkarlıq fəaliyyəti ilə məşğul olmaqda təqsirləndirilərək barəsində beynəlxalq axtarış elan edilmiş, 1974-cü il təvəllüdlü ölkə vətəndaşı Xu Penqçenq 2025-ci il ərzində ölkədə müəyyənləşib, onların haqqında həbs qətimkan tədbiri seçilib.

Baş Prokurorluq Moldova və Çinin həmin şəxslərin verilməsinə dair vəsatətlərinə baxılması üçün işi Bakı Ağır Cinayətlər Məhkəməsinə göndərib. "Ekstradisiya haqqında" Avropa Konvensiyası və "Azərbaycan və Çin arasında təslim etmə haqqında" müqaviləyə uyğun olaraq şəxslərin barəsində qərarlar qəbul edilərək Ədliyyə Nazirliyinin Penitensiar Xidmətinin xüsusi konvoyunun müşayiəti ilə Moldova və Çinə təhvil veriliblər.