Saxta generalın azyaşlıya işgəncə verən oğlu və sevgilisi ilə bağlı qərar - Foto

Bakıda əvvəllər özünü "general-mayor" kimi təqdim edərək dələduzluq etməkdə təqsirləndirilən Firdovsi Ələkbərovun oğlu Ayxan Ələkbərli və Mereuta Nina Fyodorovna yenidən hakim qarşısına çıxarılıblar.

Publika.az "Unikal"a istinadən xəbər verir ki, təqsirləndirilən şəxslər Yasamal Rayon Məhkəməsinin onlar barəsində çıxardığı həbs qərarından apellyasiya şikayəti veriblər.

Bakı Apellyasiya Məhkəməsinin hakimi Əli Məmmədovun sədrliyi ilə keçirilən prosesdə hər iki şəxs barəsində seçilmiş həbs-qətimkan tədbiri dəyişdirilmədən saxlanılıb.

Fotoda Firdovsi Ələkbərov

Qeyd edək ki, Ayxan Ələkbərli Bakıda sevgilisi Mereuta Nina Fyodorovna ilə birgə 6 yaşlı azyaşlıya işgəncə verməkdə təqsirləndirilir.

Yasamal Rayon Məhkəməsinin qərarı ilə təqsirləndirilən şəxslər barəsində həbs qətimkan tədbiri seçilib.

Məlumata görə, Mereuta Nina Fyodorovna 2024-cü ilin iyun ayının ortalarından 2025-ci ilin sentyabr ayının 6-dək paytaxtın Yasamal rayonunda yerləşən mənzildə qeyri-rəsmi yaşadığı Ələkbərli Ayxan Firdovsi oğlu ilə birlikdə özünün Ramin Ramizoğlu ilə birgə nikahından olan 23.01.2020-ci il təvəllüdlü azyaşlı övladı A.A.-nı mütəmadi olaraq bədəninin müxtəlif nahiyələrinə vurub, qaranlıq hamam otağına salıb fiziki ağrı və psixi iztirablar verməklə döyüblər.

Sonuncu dəfə 06.09.2025-ci il tarixdə həmin ünvanda azyaşlının bədəninə bel kəməri və çəkiclə bir neçə dəfə vurublar.

Keçirilmiş ekspertizaların nəticəsinə əsasən, köməksiz vəziyyətdə olan azyaşlı A.A.-nın travmadan sonra stres pozuntusu yaranıb, sağ diz oynağı nahiyəsində yumşaq toxumaları əzilib, diz oynağında hərəkət funksiyası nisbi pozulub.

Hər iki təqsirləndirilən şəxsə qarşı Cinayət Məcəlləsinin 133.2.3-cü (əzab vermə - bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən törədildikdə), 133.2.4-cü (əzab vermə - təqsirkar şəxs üçün aşkar surətdə yetkinlik yaşına çatmayan, habelə köməksiz vəziyyətdə olan şəxsə qarşı törədildikdə) və 133.2.5-ci (zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özü və ya yaxın qohumlarına qarşı törədildikdə) maddələri ilə ittiham irəli sürülüb.