Dəb

Retro ikonalarının həsir papaqları yenidən trenddə - FOTO

4 İyul 2023 05:38

Xatırlayırsınızsa, həsir çantaların moda dünyasına daxil olması və tarixi barədə məlumat vermişdik. Bu dəfə isə modapərəstlər həsir papaqların bu aləmdəki yeri ilə tanış olacaqlar.

Publika.az xəbər verir ki, həsir şlyapalar yay mövsümünün əvəzolunmaz aksessuarıdır və həmişə ekzotik cazibəsi sayəsində qızların marağına səbəb olur. Əvvəllər fəhlə sinfi ilə əlaqəli olsa da, samandan hazırlanan aksessuarlar demək olar ki, bütün moda ikonalarının yay obrazlarının əvəzolunmaz bəzəyinə çevrildi.

Onların populyarlaşmasında sösüz ki, əfsanəvi retro kino ulduzlarının xidmətləri danılmazdır. Məsələn, həsir papaqlar Bricit Bardo, Elizabet Teylor, Sofi Loren, Odri Hepbrun, Jaklin Kennedi və ya Romi Şneyderin obrazının həmişə ayrılmaz hissəsi olub. Həmçinin "Gözəlçə" filmində Culiya Robertsin xallı şərflə bəzədilmiş simvolik papağı bu filmdən sonra trend oldu.

Bu gün həsir papaq və şlyapalar yenidən trenddir. Onlar həm sarafanlar, həm kətən şortik və şalvarlarla nəinki ideal vəhdət təşkil edəcək, həm də üzünüzü günəşin ultrabənövşəyi şüalarından qoruyacaq. Odur ki, heç düşünmədən belə bir aksessuarı qarderobunuza daxil etməyə tələsin.