Pxenyandan BMT-yə AĞIR İTTİHAM: Qərəzlisiniz!

Şimali Koreya BMT-ni qərəzli olmaqda ittiham edir.

Publika.az xəbər verir ki, belə bir bəyanatı Şimali Koreyanın xarici işlər naziri Çoi Sonq He səsləndirib.

O, BMT-nin baş katibi Antonio Quterreşi qərəzli olmaqda günahlandırıb. KXDR Xarici İşlər Nazirliyi rəhbəri Antonio Quterreşin özünü Ağ Evin, eləcə də ABŞ Dövlət Departamentinin əməkdaşı kimi apardığını iddia edib:

“BMT Baş katibini qurumun nizamnaməsinin məqsəd və prinsiplərinə əməl etməyə çağırıram. Eləcə də, Quterreş bütün məsələlərdə qərəzsizliyi, obyektivliyi və ədaləti qorumaq vəzifəsini unutmamalıdır. Quterreş BMT-nin nizamnamə və prinsiplərini unudub. Ona görə də, ölkəmə qarşı bu cür acınacaqlı yanaşma sərgiləyir. Onun bu yolu seçməsindən dərin təəssüf hissi keçirirəm” .

Çoi Sonq He regiondakı “bütün fəlakətlərin” mənbəyini “ABŞ-ın təxribatçı hərəkətləri”ndə gördüyünü deyib.

O, Qərb ölkələrini il ərzində yarımadada “strateji nüvə silahları” ilə “nüvə müharibəsi üçün məşqlər” keçirməkdə ittiham edib:

“Bu da Şimali Koreyanın əks cavab tədbirləri görməsinə gətirib çıxardı. Eyni zamanda, gərginliyə səbəb oldu. BMT-nin baş katibi KXDR-i günahlandırır ki, niyə özünümüdafiə hüququndan istifadə edirsən. Bizim nüvə sınaqlarımız ədalətli şəkildə həyata keçirilir. BMT-nin Baş katibinin açıqlaması isə sadəcə təxribatdır”.

Tural Turan