İstanbulda “Böyük qətliam”ın qarşısı alındı: Paris kimi qana boyayacaqdılar

Parisdəki terror hücumları ilə eyni gündə İstanbulda təşkil edilməsi planlaşdırılan “böyük hücum”un qarşısı alınıb.

Publika.az Türkiyə mediasına istinadən xəbər verir ki, “Cihadçı Con” kimi tanınan İŞİD cəlladının Eyn Lesli Devis adlı köməkçisinin da aralarında olduğu beş nəfər ötən həftənin cümə günü İstanbulda saxlanılıb.

Adını açıqlamayan yüksək vəzifəli bir türk səlahiyyətli Fransanın AFR agentliyinə açıqlamasında bildirib ki, saxlanılan şəxslər Paris hücumları ilə eyni gündə İstanbulda terror aktları planlaşdırıblar. “İlk araşdırmalar böyük bir hücumun qarşısının alındığını göstərir”, - türk səlahiyyətli deyib.

O, saxlanılan şəxslərin Parisdə 132 nəfərin ölümünə səbəb olan hücumlarla əlaqəsinin olub-olmadığının araşdırıldığını söyləyib. Səlahiyyətli bütün ehtimalların qiymətləndirildiyini əlavə edib.

Qeyd edək ki, Amerikanın pilotsuz təyyarəsi ötən həftənin cümə axşamı Suriyada İŞİD terror qruplaşmasının cəlladı, “Cihadi Con” kimi tanınan Məhəmməd Emvazini vurub.

“Reuters” agentliyi ötən hətfə Məhəmməd Emvazinin güman edilən müttəfiqi Eyn Lesli Devisin Türkiyədə saxlanıldığını bildirib. Qeyd olunub ki, o, Suriyada xarici əsirlərin müşayiət edilməsinə görə məsuliyyət daşıyan döyüşçülər qrupuna daxil idi.

Ömər Dağlı