Dünya

Bağdad Türkiyədən NATO-ya şikayət etdi

9 Dekabr 2015 05:16

İraqın baş naziri Haydar əl-Abadi Türkiyənin üzv olduğu Şimali Atlantika İttifaqına (NATO) müraciət edib.

Publika.az “Reuters” agentliyinə istinadən xəbər veirir ki, baş nazir ittifaqa öz “mənəvi nüfuzundan istifadə etməyi” və İraqın şimalından qoşunlarını çıxarmaq üçün Türkiyəyə təzyiq göstərməyi xahiş edib.

“Türkiyəni İraq ərazisindən qoşunlarını çıxarmağa vadar etmək üçün NATO öz nüfuzundan istifadə etməlidir”, - baş nazirin saytında yerləşdirilən bəyanatda deyilir.

Qeyd edək ki, Bağdadın Ankaraya verdiyi ultimatumun müddəti noyabrın 8-i axşam saatlarında başa çatıb. Türkiyədən qoşunlarını ölkə ərazisindən çıxarmağı tələb edən İraq ultimatumun yerinə yetirilməyəcəyi halda Türkiyəni cavab ölçüləri ilə hədələyib.

Türkiyənin xarici işlər naziri Mövlud Çavuşoğlu isə bildirib ki, Ankara İraqdan öz qoşunlarını çıxarmaq niyyətində deyil. O, qeyd edib ki, türk hərbçiləri “İslam dövləti” (İŞİD) ilə mübarizədə Bağdada kömək edir.

Ömər Dağlı