Moskva Ermənistana yenə döyüş vertolyotları göndərdi

Rusiya hərbi vertolyotlarının ikinci partiyası İrəvandakı Erebuni aerodromunda yerləşən aviasiya bazasına gətirilib.

Publika.az “İnterfaks” agentliyinə istinadən xəbər verir ki, bu barədə Rusiya Silahlı Qüvvələri Cənub hərbi dairəsinin mətbuat xidmətindən bildirilib.

Məlumata görə, 6 ədəd Mi-24P zərbə və Mi-8MT nəqliyyat helikopteri Krasnodar vilayətindəki hərbi aerodromdan Ermənistana çatdırılıb.

Dekabrın əvvəlində isə yeddi Mi-24P və Mi-8MT helikopteri Erebuni hərbi bazasında yerləşdirilib. Aviasiya vasitələrinin yığımı bir ay ərzində aparılacaq, 2016-cı il yanvarın əvvəlindən isə pilotlar sınaq uçuşlarına başlayacaqlar.

Rusiyanın Cənub hərbi dairəsinin İrəvanda yerləşən aviabazası 1995-ci ildə yaradılıb. 1998-ci ilin noyabrında bazaya Rusiyadan çoxməqsədli MiQ-29 qırıcıları gətirilib. 2001-ci ilin iyul ayında Erebunidə yerləşdirilən hissələrdən aviabaza formalaşdırılıb, bu aviabaza Gümrüdə yerləşən 102-ci hərbi bazanın hava komponentinə çevrilib.

Ömər Dağlı