Putin “anti-işğal” qanunu imzaladı – 5 il müddətində...

Rusiya prezidenti Vladimir Putin Uzaq Şərqdə torpaq sahələrinin vətəndaşların pulsuz istifadəsinə verilməsi haqqında qanunu imzalayıb.

Publika.az Rusiya mediasına istinadən xəbər verir ki, sənəd hüquqi informasiyanın rəsmi internet-portalında dərc edilib.

Qanuna əsasən hər rusiyalı dövlət və ya bələdiyyə mülkiyyətində olan bir neçə hektar torpağı beş il müddətində icarəyə götürə bilər. Bu ərazidən ev tikintisi, sahibkarlıq və ya fermer təsərrüfatı üçün istifadə etmək olar. Torpağı Yakutiya Respublikası, Kamçatka, Primorsk və Xabarovsk diyarları, Amur, Maqadan və Saxalin vilayətləri, Yəhudi muxtar vilayəti və Çukot muxtar dairəsindən almaq mümkündür.

Beş il sonra torpağı rəsmiləşdirmək və mülkiyyətə almaq mümkün olacaq. Amma alqı-satqısına icazə verilmir. Torpağı kirayə vermək, əcnəbilərə və ya onların iştirakı ilə yaradılan şirkətlərə, həmçinin vətəndaşlığı olmayan insanlara vermək olmaz.

Qanun layihəsi Putinin tapşırığı ilə hazırlanıb. Sorğulara əsasən, Uzaq Şərq sakinlərinin 63 faizi hesab edir ki, torpağın pulsuz verilməsi regionda həyat səviyyəsini yüksəldəcək.

Rusiya liderinin Çinin Uzaq Şərqə ekspansiyasının (bəzi ekspertlər bunu “iqtisadi işğal” adlandırırlar – red.) gücləndiyi bir vaxtda belə bir təşəbbüslə çıxış etməsi diqqət çəkir. Kreml Çinin Uzaq Şərqə güclənən ekspansiyasından olduqca narahatdır. Pekin müxtəlif vasitələrlə bu regiona iddia edir. Çin tarixinin səkkizinci sinif dərsliyində yazılan aşağıdakı fikirlər də bunu deməyə əsas verir: “Rusiya imperiyası ikinci tiryək müharibəsindən sonra Böyük Britaniya və Fransa ordusu tərəfindən Çinin işğal edilməsindən istifadə edərək Çinin şimali-şərq və şimali-qərbindəki 1,5 milyon kvadrat kilometr ərazisini işğal etdi”.

Pekin hesab edir ki, Rusiya imperiyası onun zəifləməsindən istifadə edərək Çini “bərabərhüquqlu olmayan” müqavilələr imzalamağa məcbur edib. Söhbət 1858-ci ildəki Ayqunsko və 1960-cı ildəki Pekin müqaviləsindən gedir. Rusiya-Çin sərhədi qəti olaraq 2008-ci ildə müəyyən olunub. Bununla belə Rusiya Çinin ərazi iddialarından narahat olmaqda davam edir.

Son onillikdə baş verənlər isə belə bir təəssürat yaradır ki, Çin Rusiyanın silah gücünə işğal etdiyi torpaqları iqtisadi gücü hesabına geri qaytarmaq üçün hazırladığı planları həyata keçirir. Təsadüfi deyil ki, son illər Rusiyanın Uzaq Şərq regionuna çinlilərin böyük ekspansiyası həyata keçirilir. Rusiya ilə bunu milli təhlükəsizliyi üçün təhdid kimi görür və liderlərinin bəyanatları, dövlətin atdığı addımlar bunun sübutudur.

Təbii resurslara zəngin dünyanın ən böyük ölkəsi olan Rusiyanın 143 milyonluq əhalisi son illərdə azalıb. Resurslara ac olan Çin Rusiyanın qonşusudur və əhali artıq 1,3 milyarddan çoxdur. Rusiya üçün mənfi hal sayılacaq məqam isə odur ki, Çin ölkənin məhz daha az inkişaf edən Uzaq Şərq regionu ilə həmsərhəddir. Bundan isə Pekinin istifadə etməsi qaçılmaz olacaq, əgər Moskva regionun inkişafına üçün təcili tədbirlər görməsə və çinlilərin ekspansiyasına qarşı xüsusi addımlar atmasa.

Ömər Dağlı