İŞİD son qala üçün döyüşə hazırlaşır

Suriyada İŞİD terror qruplaşmasının döyüşçüləri Deyr-ez-Zor rayonuna ağır texnika cəlb edirlər.

Publika.az “RİA-Novosti” agentliyinə istinadən xəbər verir ki, bunu Rusiya Müdafiə Nazirliyinin informasiya və kütləvi kommunikasiyalar departamenti bildirib.

Məlumata görə, Suriya güclərinin Rusiya hərbi aviasiyasının dəstəyi ilə Qanem-Ali şəhəri ərazisində müvəffəqiyyətli hücumundan sonra İŞİD döyüşçüləri Deyr-ez-Zorda yenidən qruplaşmağa çalışırlar.

“İŞİD anlayır ki, Deyr-ez-Zor ətrafında müharibə meydanı Suriya torpağında onların son qalasıdır. Buna görə də döyüşçülər əraziyə ağır texnika, tanklar, böyuk kalibrli silahlar və minaatanlar cəlb edirlər”, - Müdafiə Nazirliyindən bildiriblər.

Daha əvvəl Rusiyanın müdafiə naziri Sergey Şoyqu deyib ki, Deyr-ez-Zorun azad edilməsi Suriya xəritəsində İŞİD-lə mübarizədə həlledici olacaq.

Qeyd edək ki, Deyr-ez-Zor və hərbi aerodrom terrorçuların mühasirəsindədir. Kamikadzelər və minalanmış avtomobillərdən istifadə ilə müntəzəm hücumlara baxmayaraq, Deyr-ez-Zor qarnizonu terrorçuların hücumlarını dəf edir. Ərzaq və hərbi döyüş sursatları yalnız hava yolu ilə təchiz edilir.

Ömər Dağlı