Dünya

Filippində tropik qasırğa: ölənlərin sayı 167-yə çatdı

16 Aprel 2022 08:48

Filippində "Aqaton" (beynəlxalq adı - "Megi") tropik siklonu nəticəsində ölənlərin sayı 167 nəfərə çatıb, daha 110 nəfər itkin düşüb.

Publika.az"RIA Novosti"yə istinadla xəbər verir ki, bu barədə Fövqəladə Halların İdarə Olunması və Fəlakət Riski üzrə Şuranın yaydığı məlumat deyilir.

Bildirilib ki, təbii fəlakət ümumilikdə iki milyona yaxın insana ziyan vurub.

Aprelin 9-dan 12-dək olan siklon Filippin ərazisindən keçərək 787 yerdə daşqınlara və 89 torpaq sürüşməsinə səbəb olub. Səkkiz nəfər yaralanıb.

Şuranın məlumatına görə, Filippinin 76 şəhərində elektrik enerjisi təchizatı dayandırılıb, 10,3 mindən çox evə ziyan dəyib, onlardan 664-ü tamamilə dağılıb. Ölkənin 192 şəhərində məktəblərdə dərslər ləğv edilib.

"Aqaton" siklonu Filippin kənd təsərrüfatına 242,2 milyon Filippin pesosu (4,6 milyon dollardan çox) ziyan vurub.