Prezidentə qarşı sui-qəsd necə təşkil edilib? - Saxlanılanlar var - Video

ABŞ-da Haiti prezidentinə sui-qəsddə şübhəli bilinən şəxslər saxlanılıb.

Publika.az xəbər verir ki, ABŞ hakimiyyəti 2021-ci ildə Haiti prezidenti Jovenel Moizeyə qarşı sui-qəsdlə bağlı 3 şübhəlini saxlayıb. Bu barədə "The New York Times" yazır.

Nəşrin məlumatına görə, şübhəlilər Venesuela əsilli amerikalı iş adamı Antonio İntriaqo, Kolumbiya əsilli ABŞ vətəndaşı Arkangel Pretel Ortiz və amerikalı maliyyəçi Valter Vinemilladır.

Qəzetin yazdığına görə, İntriaqo və Ortiz Floridada yerləşən “CTU Security təhlükəsizlik şirkəti”nə sahibdirlər. Bu şirkət, nəşrin yazdığına görə, Moizin öldürüldüyü gecə "Haiti prezidentinin evinə basqın etməyə kömək edən 20-yə yaxın kolumbiyalı keçmiş əsgəri işə götürüb".

Vinemillanın Haitidəki əməliyyatları maliyyələşdirmək üçün “CTU Security”yə 172.000 dollar borc verdiyi deyilir.

Xatırladaq ki, Jovenel Moize 7 iyul 2021-ci il gecəsi iqamətgahına edilən hücumda ölümcül yaralanıb. Haiti hakimiyyəti 18 Kolumbiya vətəndaşı, beş ABŞ vətəndaşı və dörd polis əməkdaşı, prezidentin təhlükəsizlik xidmətinin iki əməkdaşı və cinayətin təşkilatçısı olduğu iddia edilən həkim və pastor Emmanuel Sanon da daxil olmaqla 40-dan çox adamı saxlayıb.

Mehti Kamiloğlu