İran təkzib etdi: Tehran Vaşinqtonla əlaqə saxlamayıb

Prezident Donald Tramp vəzifəyə gəldikdən sonra İran ABŞ-da yeni administrasiya ilə kommunikasiya mübadiləsi aparmayıb.

Publika.az xəbər verir ki, bu barədə İranın nazir müavini Məcid Taxt-Rəvançi İSNA agentliyinə müsahibəsində bildirib.

“Hər hansı kommunikasiya kanalları haqqında danışmaq hələ tezdir, baxmayaraq ki, İsveçrənin Tehrandakı səfirliyi vasitəsilə mesaj mübadiləsi üçün rəsmi kanal mövcuddur, bundan sonra da mövcud olacaq”, - deyə Rəvançi qeyd edib.

O əlavə edib ki, tərəflər arasında Maskat vasitəsilə əlaqə kanalının bağlanmasına baxmayaraq, İran və ABŞ arasında mesajlar ötürən başqa ölkələr də var.

Qeyd edək ki, 2024-cü ilin may-oktyabr aylarında İran və ABŞ Omanın vasitəçiliyi ilə dolayı danışıqlar aparıblar və bu danışıqlarda birtərəfli Amerika sanksiyalarının ləğvi, eləcə də Tehranın nüvə proqramı müzakirə edilib. Lakin oktyabrın 14-də İran hakimiyyəti Yaxın Şərq regionundakı vəziyyətlə əlaqədar danışıqları dayandırıb.

Məlumatda İranın xarici işlər naziri Abbas Əraqçinin fikri də xatırladılır: "İran öz vətəndaşlarının və milli maraqlarının qorunmasında heç bir güzəştə getməyəcək".

Adəm Abbaslı