Tarix

Tarix muzeyindən qədim qızıl dəbilqə oğurlandı

28 Yanvar 2025 04:50

Oğrular Niderlandın Assen şəhərində Drents muzeyinə partlayıcı qurğu vasitəsilə daxil olaraq 2400 il yaşı olan qədim Kotofeneşti dəbilqəsini və 4 əntiq qızıl əşyanı oğurlayıblar.

Publika.az xəbər verir ki, oğurlanan əşyalar arasında üç ədəd qızıl spiralvari bilərzik və Rumıniyanın Milli Tarix Muzeyi tərəfindən təqdim edilən nadir dəbilqə olub.

Hadisə yerinə gələn Assen polisi muzey yaxınlığında yanan avtomobil aşkar edib. Ehtimal edilir ki, avtomobil oğrular tərəfindən istifadə edilib. İstintaqa İnterpol cəlb edilib, polis isə kamera görüntülərini araşdırır.

Drents muzeyinin baş direktoru Harri Tupan hadisəni muzeyin tarixində “qara gün” adlandırıb. Onun sözlərinə görə, muzeyin 170 illik tarixi ərzində buna bənzər hadisə baş verməyib.

Qeyd edilir ki, oğurlanan dəbilqə 1927-ci ildə Rumıniyada kəndlərdən birində uşaq tərəfindən aşkar edilib. Uşaq əşyanı oyuncaq və su qabı kimi istifadə edib və bu da onun zədələnməsinə səbəb olub.