Etiraz faciə ilə bitdi: ABŞ bazasına qarşı aksiyada ölənlər var

Yaponiyanın Okinava prefekturası sahillərində ABŞ hərbi bazasının tikintisinə qarşı keçirilən etiraz aksiyası faciə ilə nəticələnib.

Publika.az xəbər verir ki, bu barədə TASS Yaponiyanın ictimai televiziyası NHK-ya istinadən məlumat yayıb.

Henoko bölgəsi yaxınlığında içərisində təxminən 20 etirazçının olduğu iki qayıq aşıb. Hadisə martın 12-dən etibarən regiondakı güclü fırtına xəbərdarlığı fonunda baş verib.

Xilasetmə xidmətlərinin bildirdiyinə görə, iki nəfər huşsuz vəziyyətdə xəstəxanaya çatdırılıb, lakin onların həyatını xilas etmək mümkün olmayıb. Daha on nəfər isə yüngül xəsarətlər alıb.

Hazırda xilasedicilər axtarış əməliyyatını davam etdirir. Bir neçə aksiya iştirakçısının itkin düşdüyü bildirilir.

Hadisə ABŞ dəniz piyadalarına məxsus Futenma aviabazasının köçürülməsi planlaşdırılan ərazidə baş verib. Yaponiya və ABŞ hökumətləri bazanı sıx məskunlaşmış Qinovan şəhərindən Henoko bölgəsinə köçürməyi planlaşdırır. Lakin yerli sakinlər bu qərara uzun illərdir etiraz edir və hərbi bazanın adadan tam çıxarılmasını tələb edirlər.

Qeyd edək ki, Okinava ABŞ-ın Yaponiyadakı hərbi mövcudluğunun əsas mərkəzi sayılır. Məlumata görə, ölkədə yerləşən Amerika hərbi obyektlərinin təxminən 75 faizi məhz bu adada yerləşir.

Adəm