Qanunsuz balıq ovlayan şəxslər cəzalandırıldı

Dövlət Ekoloji Təhlükəsizlik Xidməti və Su Nəqliyyatında Polis İdarəsinin əməkdaşlarının birgə keçirdiyi növbəti nəzarət tədbiri zamanı Mingəçevir su anbarının Alazan çayına birləşən və Samux inzibati rayonuna aid olan hissəsində qanunsuz balıq ovlayan şəxslər saxlanılıb.

Bu barədə Publika.az-a Xidmətin rəisi Hikmət Əlizadə bildirib.

Onun sözlərinə görə, araşdırma zamanı brakonyerlərin Yevlax rayon sakinləri Azər Məlikov, Cavad Quluzadə, Nuruş Müslümov və Mingəçevir şəhər sakini Rövşən Cəfərov olduğu məlum olub: "Onlardan istifadəsi qadağan olunan ov alətləri, müxtəlif növ balıqlar götürülüb. Faktla bağlı Azər Məlikov və Cavad Quluzadə barəsində protokol tərtib edilərək hər biri 1500 manat məbləğində cərimə olunub. Digər təqsirkarlar Nuruş Müslümov və Rövşən Cəfərov barəsində isə akt tərtib olunub və təbiətə 2970 manat məbləğində ziyan vurduqları müəyyən edilib. Təbiətə dəymiş ziyanın məbləği cinayət tərkibi yaratdığından məsələyə hüquqi qiymət verilməsi və təqsirkar şəxslər barəsində qanunamüvafiq tədbirlərin görülməsi üçün hazırda Su Nəqliyyatında Polis İdarəsində istintaq aparılır”.