Bu şəxslərə 1 milyard manatdan çox kredit verilib - Şahin Mustafayev

“Bu il Rusiyaya pomidor ixracında hər hansı problem olmayacaq".

Publika.az xəbər verir ki, bu sözləri iqtisadiyyat naziri Şahin Mustafayev “Azərbaycan Respublikası regionlarının 2014-2018-ci illərdə sosial-iqtisadi inkişafı dövlət proqramı”nın icrasının yekunlarına həsr olunmuş konfransında çıxışı zamanı deyib.
Nazir bildirib ki, pomidorun ixracı ilə bağlı lazım olan görüşlər təşkil olunub.

“Sonuncu dəfə ötən ilin dekabrında Rusiyada keçirilən iclasda bu məsələ müzakirə olunub. Hazırda bu sahədə hər hansı problem yoxdur. İxracın dəstəklənməsilə bağlı qarşıda bir neçə məsələ qoyulub və təkcə keçən 10 ölkəyə 11 ixrac missiyası həyata keçirilib”.

Nazir bildirib ki, 2014-2018-ci ildə 16 mindən çox sahibkara ümumi dəyəri 2,6 milyard manat olan layihələrə 1 milyard manatdan çox güzəştli kredit verilib.

“Bunun 79 faizi aqrar sektora, 20 faizi isə müxtəlif sənaye və digər sahələrin inkişafına ayrılıb. Bunun da 70 faizi regionların payına düşür. 2018-ci ildə geri qaytarılan vəsaitlər hesabına sahibkarlara 160,2 milyon manat dövlətin güzəştli krediti verilib. Cari ildə geri qaytarılan vəsaitlər hesabına minimum 160 milyon manatadək kredit veriləcək".

Gülxar