"Çin şoku 2.0" iddiası: Pekindən reaksiya gəldi

Çin hakimiyyəti Qərb iqtisadçılarının ölkə ilə bağlı səsləndirdiyi "Çin şoku 2.0" ehtimallarına münasibət bildirib.

Publika.az "Xinhua" agentliyinə istinadən xəbər verir ki, bu barədə Çinin Ticarət Nazirliyi məlumat yayıb.

Nazirlik bu narahatlıqları əsassız adlandırıb.

Nazirliyin "Qondarma izafi istehsal gücləri məsələsi üzrə Çinin mövqeyi" adlı sənədində bildirilir ki, ABŞ və bir sıra Qərb ölkələri Çinin sənaye inkişafının guya Qərb iqtisadiyyatının dominant mövqeyini təhdid etdiyini və Qlobal Cənub ölkələrinin inkişaf imkanlarını məhdudlaşdırdığını iddia edir.

Nazirlik isə bu ittihamların heç bir faktiki əsası olmadığını vurğulayıb. Qurum Pekinə qarşı irəli sürülən ittihamları "yalan" və "tamamilə əsassız" adlandırıb.

Nazirlik həmçinin qeyd edib ki, son on ildə dünya iqtisadi artımının təxminən 30 faizi Çinin payına düşüb. Pekin hesab edir ki, bu göstərici ölkənin qlobal iqtisadiyyatın əsas hərəkətverici qüvvələrindən biri olduğunu təsdiqləyir.

Müəllif: Adəm