Hadisə

Əlvida, Rafiq Hüseynov! - FOTOLAR (YENİLƏNDİ)

3 Noyabr 2017 13:23

Xalq artisti, diktor Rafiq Hüseynov dəfn olunub.

O, Yasamal qəbiristanlığında torpağa tapşırılıb.

***

Xalq artisti Ramiz Mirzəyev bildirib ki, Rafiq Hüseynov bir müddət ekrandan kənarda qalıb.

Publika.az xəbər verir ki, o, sözlərinə belə davam edib: "Narahat idi ki, yeni nəsil onu tanımır. Amma unutmuşdu ki, o, Azərbaycanın yaddaşında həmişəlik qalıb. Nə yaxşı ki, çəkilən filmlərdə onun səsi var. Əlvida, Rafiq".

Əməkdar artist Nərgiz Cəlilova da Rafiq Hüseynovla bağlı xatirələrini bölüşüb: "Mən Rafiq müəllimin tələbələri və yetirmələri adından son dəfə ürək sözlərimi çatdırmaq istəyirəm. Rafiq müəllim son proqramda belə bir fikir söyləməşdi ki, övlad valideynini son mənzilə yollamamalıdır. Biz Rafiq müəllimlə övladı qədər ona doğma ola bilmərik. Gec-tez biz onunla o dünyada görüşəcəyik. Yarımçıq qalan sözlərimizi deyəcəyik. Mən Rafiq müəllimə əlvida demirəm. Görüşərik, əziz müəllim!.."

***

Millət vəkili Qənirə Paşayeva Rafiq Hüseynovla bağlı xatirələrini bölüşüb.

Publika.az-ın xəbərinə görə, o, Xalq artisti ilə xaricdə xəstəxanada görüşdüyünü dilə gətirib: "Çox həyat dolu idi. Rafiq müəllim yaşamaq üçün xəstəliklə sona qədər mübarizə apardı. Biz söhbət edəndə xəstəliklə əzmlə mübarizə aparmasının şahidi oldum. Gənclərin onun peşəkarlığına, nəsihətlərinə ehtiyacı var. Mən ona dedim ki, sizin etməli olduğunuz çox şey var. Gənclər sizdən çox şeyləri öyrənməlidirlər. Bunun üçün xəstəliklə mübarizə aparmalısız. O, isə güldü...".

Millət vəkili qeyd edib ki, Birinci vitse-prezident Mehriban Əliyeva hər zaman Xalq artistinə dəstək olub: "Onun yaşaması üçün ailəsi də onunla mübarizə apardı. Rafiq müəllim kimi peşəkarlara çox ehtiyacımız var. Çox təəssüf edirik ki, xəstəlik şiddətləndi. Bütün tibbin imkanlarına rəğmən xilas etmək olmadı. Nur içində yatsın. Hər zaman yeri görünəcək şəxsiyyətdir. Peşəkar kimi sevgi ilə xatırlanacaq".

***

Fərhad Bədəlbəyli mərhumun ölümündən çox heyfsləndiyini bildirib.

Publika.az-ın xəbərinə görə, o, dostlarımızı bir-bir itiririk deyərək sözlərinə belə dabam edib: "Dost gedəndə ürəkdən bir parça gedir. O, əsl ulduz idi. Müslüm Moqamayevin vaxtında Rafiq onun qədər məşhur idi. Moskvada onu böyük diktor adlandırırdılar. Çox təəssüf ki, bəzi məmurlarımız onu televiziyadan uzaqlaşdırdılar. Biz öz böyük insanlarımızın qədrini bilmirik. Çox heyif..."

***

Tanınmış diktor Rafiq Həşimov isə mərhum haqqında fikirlərini belə ifadə edib: "Bəzən deyirlər əvəzedilməz insan yoxdur. Lakin Rafiq Hüseynov unudulmaz adam idi. Rafiq Hüseynov demək, böyük bir dövr, epoxa deməkdir. Azərbaycan xalqına böyük itki üz verdi. Çox təəssüf edirəm".

***

Xalq artisti Ofeliya Sənani Rafiq Hüseynovun gözəl səsə malik əvəzolunmaz diktor olduğunu qeyd edib.

Publika.az-ın xəbərinə görə, o, R.Hüseynovun yoxluğunu böyük itki olduğunu deyib: "Biz diktorlar bu yaşda yetim qaldıq. O, bizim əla dostumuz idi. Onun məsləhətinə hər zaman ehtiyacımız var. Xəstə ola-ola bizə öz məsləhətlərini verirdi. Heç kəs məndən inciməsin, amma onun kimi diktor olmayacaq. Rafiq Hüseynova Moskvada iş təklif etmişdilər. Ev və yüksək maaş da verirdilər. O, buna razı olmadı. Demişdi ki, Azərbaycandan kənarda qala bilmərəm. Allah onu o qədər çox istəyir ki, vida mərasiminin keçirilməsi televiziyanın yubileyi ərəfəsinə düşdü".

***

Əməkdar artist Gülşən Əkbərova Rafiq Hüseynov haqda xatirələrini danışarkən göz yaşlarını saxlaya bilməyib.

Publika.az xəbər verir ki, o, sözlərinə belə davam edib: "Rafiq böyük bir məktəb idi. Azərbaycan incəsənəti üçün böyük bir itkidir. O, bizim yaddaşımızda hər zaman uca bir zirvə olaraq qalacaq" .

***

Diktor Şərqiyyə Hüseynova Xalq artistinin ölümdən çox kədərləndiyini bildirib.

Publika.az-ın xəbərinə görə, o, belə deyib: "Bu gün mənim üçün çox ağır gündür. 50 illik dostumuzu, qardaşımızı itirmişik. Çox gözəl dost, yoldaş idi. Bizə arxa-dayaq olub".

***

Rəşid Behbudov adına mahnı Teatrında Xalq artisti Rafiq Hüseynovla vida mərasimi başlayıb.

Publika.az xəbər verir ki, tədbirə mərhumun sənət dostları, bir sıra vəzifəli şəxslər, aparıcılar Ofeliya Sənani, Şərqiyyə Hüseynova, Nərgiz Cəlilova və başqaları qatılıb.

Pərviz,

Foto: Elçin Murad