Hadisə

Daşkəsəndə mikroavtobus avtomobillə toqquşdu - Xəsarət alanlar var (YENİLƏNDİ)

30 Aprel 2018 23:24

Daşkəsən-Gəncə yolunda sərnişin mikroavtobusunun "VAZ-2106" markalı avtomobil ilə toqquşması nəticəsində 6 nəfər xəsarət alıb.

Onlardan biri 11 yaşlı qız, digəri isə 6 yaşlı oğlan uşağıdır.

Qəza zamanı xəsarət alan 1965-ci il təvəllüdlü Verdiyeva Zərqələm, Əliyev Çapay (1957), Allahverdiyev Zahid (1964) və Qurbanov Elşən (1967) Gəncə şəhər Təcili Tibbi Yardım Xəstəxanasına, adları hələ ki, məlum olmayan iki azyaşlı isə Gəncə şəhər 2 saylı Uşaq Xəstəxanasına çatdırılıb.

Yaralıların vəziyyəti orta-ağır qiymətləndirilir. Qəza nəticəsində "VAZ-2106" markalı avtomobildə olan 3 nəfərdən biri yüngül xəsarət alıb. Ona hadisə yerində ambulator yardım göstərilib.

***

Daşkəsən rayonunda sərnişin mikroavtobusu qəzaya uğrayıb.

"Report"un məlumatına görə, mikroavtobus Daşkəsən - Gəncə yolunun 18 km-də "VAZ-2106" markalı avtomobillə toqquşub.

Nəticədə bir neçə nəfər xəsarət alıb. Yaralılar xəstəxanaya yerləşdirilib.

Faktla bağlı araşdırma aparılır.