Nəhənglərin hədəfində olan türk

Dortmund "Borussiya"sının Türkiyə əsilli alman ulduzu İlkay Gündoğan gələcək karyerası ilə bağlı bəzi açıqlamalar verib.

Publika.az xəbər verir ki, Gündoğan yayda klubuyla müqaviləsinin müddətini 2017-ci ilə qədər artırsa da, adı yenə transfer xəbərlərində hallanır.

Adı "Barselona", "Mançester Yunayted" və "Yuventus"la yanaşı çəkilən 25 yaşlı futbolçunun "Liverpul" tərəfindən də hədəfə alındığı deyilir. Hazırda “Liverpul”un baş məşqçisi Yürgen Kloppun İlkayı almaqda israrlı olduğu iddia edilir.

Futbolçunun özü isə məsələ ilə bağlı belə açıqlama verib:

“Hazırda elə bir yenilik yoxdur. Özümü Dortmundda çox yaxşı hiss edirəm və bu klubda nələrə sahib olduğumun fərqindəyəm. Nə vaxtsa gələcək karyeramla bağlı qərar vermək lazım olduğunu bilirəm. O zaman Dortmund klubuyla normal şəkildə oturub danışacağam. Ancaq nə zaman olacağını hələ bilmirəm. "Borrusiya"da hər kəs yenidən Çempionlar Liqasına dönmək istəyir. Ancaq Çempionlar Liqasına qatılmamaq komandadan ayrılacağım anlamına gəlməsin".

Qeyd edək ki, bu mövsüm sadəcə bir matçı buraxan İlkay 24 rəsmi matçda forma geyinib və 2 qol, 5 məhsuldar ötürmə müəllifidir.

Aygün