Azərbaycanda ilk dəfə əbədiləşdirildi

Rahid Əmirquliyevin qış fasiləsində “Xəzər Lənkəran”dan ayrılacağı məlumdur. Klub rəhbərliyi kapitanın xidmətlərini nəzərə alaraq, onun formasını əbədiləşdirəcək. Bu barədə komandanın azarkeşlərlə iş üzrə əlaqələndiricisi Elman Tağıyev “facebook” hesabı vasitəsi ilə məlumat verib.

O, bu ideya ilə bağlı rəhbərliyə müraciət etdiklərini və müsbət cavab aldıqlarını bildirib. Bundan sonra cənub klubunun heyətində “14” nömrəli formada futbolçu olmayacaq.

Məsələ ilə bağlı cənub klubunun mətbuat xidmətinin rəhbəri Hüseyn Cəbrayıloğlu Publika.az-a belə açıqlama verib: “Hələ ki, ilin sonuna doğru üç oyunumuz var. Bu oyunlardan sonra bir çox məsələlərə aydınlıq gələcək. O cümlədən kapitanımız Rahid Əmirquliyevin komandadan ayrılması səbəbindən onun forması əbədiləşdirilə bilər. Muzeydə saxlanacaq 14 nömrəli forma nəvaxtsa kluba geri dönüşündə təkrar geyinənə qədər kimsəyə verilməyəcək. Bütün bunlar müzakirə olunan məsələlərdir və dekabrın sonu qərarlar veriləcək”.

Aygün İlqarqızı