İdman

“Bakı” “Qarabağ”la oyuna çıxacaq - “Futbolçuların pulu ödənilməsə də...”

6 Fevral 2015 12:22

Azərbaycan Premyer Liqasının növbəti turunda "Qarabağ"la qarşılaşacaq olan "Bakı" klubunun matça çıxmayacağıyla bağlı söz-söhbət dolaşır.

Futbolçular maaş verilmədiyi üçün "Qarabağ"la görüşə çıxmamaq qərarına gəliblər. Oyuna isə bir gün qalıb. Klubun düşərgəsindəki vəziyyəti öyrənmək üçün “Bakı” klubunun icraçı direktoru Yaşar Seyidovla əlaqə saxladıq. Publika.az-a danışan klub rəsmisi istənilən halda bu oyunun baş tutacağını bildirdi:

“İstənilən halda futbolçular oyuna çıxmalıdırlar. Mən dünən də onlarla söhbət edib başa saldım ki, peşəkar futbolçu meydana çıxıb oynamalıdır. Problemlər də klub rəhbərliyinin problemləridir. Bunun həll olunmasına çalışırlar.

Akademiyamızın futbolçularından 2-3 nəfər transferlərini yekunlaşdırıb, yerdə qalanlar isə yenə futbolsuz qala bilər. Ona görə futbolçu həmişə oynamalıdır.

Bir sözlə narahatçılığa dəyməz, bütün hallarda bu oyun baş tutacaq. Düzdür, komandada bir az əhval-ruhiyyə yaxşı deyil. Bizi də narahat edən budur”.

Aygün İlqarqızı