İspaniya DÇ-2030-dan imtina edir? - Merdən sensasion çağırış

Madrid meri Xose Luis Martines Almeyda, 2030-cu il Dünya Kuboku finalının Mərakeşin Kasablanka şəhərində keçirilməsi şanslarının artdığı bir vaxtda, bu qərarın doğruluğunu şübhə altına alıb.

Publika.az xəbər verir ki, siyasətçinin sözlərini “Marca” sitat gətirib:

“Mən nikbin deyiləm, inanıram ki, Mərakeş və onun kralı bu finala ev sahibliyi etmək istəyir və məntiqi olaraq, onun baş tutmasını təmin etmək üçün siyasi və institusional səviyyələrdə hərəkət edirlər.

Hökumətimizin eyni istiqamətdə hərəkət etdiyinə dair heç bir dəlilim və ya sübutum yoxdur. Əgər final Madriddə keçirilməsə, bu, Dünya Kubokuna ev sahibliyi etməyə dəyib-dəymədiyi haqda düşünməliyik.

Qərar vermək məndən asılı deyil, amma final Madriddə keçirilməsə, düşünürəm ki, nəticələr olmalıdır”.

Xatırladaq ki, 2030-cu il Dünya Kuboku İspaniya, Portuqaliya və Mərakeşdə keçiriləcək. Avqustun əvvəlində İspaniya parlament qrupu “Sumar” Seutadakı qanunsuz miqrantların axını səbəbindən turnirin Mərakeşlə birgə keçirilməməsinə çağırmışdı.

Publika.az