Səudiyyə Ərəbistanına keçidinin səbəbini açıqladı: “Hər kəs buna razı olardı”

İngiltərənin “Mançester Siti” klubundan Səudiyyə Ərəbistanının “Əl-Qadsiah” komandasına transfer olunan Tijjani Reijnders keçidinin səbəblərindən danışıb.

Publika.az xəbər verir ki, 25 yaşlı niderlandlı yarımmüdafiəçi “NOS”a müsahibəsində “Mançester Siti”də daha bir mövsüm keçirmək istəmədiyini bildirib. Reijnders klubda vəziyyətin əvvəlki istiqamətdə davam etdiyini gördükdən sonra başqa variantlara baxmaq qərarına gəldiyini deyib.

Futbolçu “Əl-Qadsiah”ın baş məşqçisi Brendan Rocerslə görüşünün də qərarında rol oynadığını açıqlayıb. Rocersin ona Səudiyyə Ərəbistanında 3-4 il oynadıqdan sonra yenidən Avropaya qayıtmağın mümkün olduğunu söylədiyini qeyd edən Reijnders bunun özünün də planı olduğunu vurğulayıb.

Niderland millisinin üzvü maliyyə amilinin də qərarında mühüm rol oynadığını gizlətməyib. O, karyerasını başa vurduqdan sonra işləmək məcburiyyətində qalmamaq və gələcək nəsillərinə daha yaxşı həyat təmin etmək istədiyini bildirib.

Qeyd edək ki, “Əl-Qadsiah” Reijndersi transfer etmək üçün “Mançester Siti”yə 52 milyon funt-sterlinq ödəyib.