Maradona işi ilə bağlı gözlənilməz iddia: Ölümünün səbəbi bu ola bilər

Dieqo Maradonanın ölümü ilə bağlı məhkəmə prosesində gözlənilməz iddia səsləndirilib.

Publika.az xəbər verir ki, məhkəmənin rəsmi eksperti, məhkəmə-tibb mütəxəssisi Pablo Ferrari argentinalı futbol əfsanəsinin COVID-19 səbəbindən ölmüş ola biləcəyini istisna etməyib.

Ferrari bildirib ki, 2020-ci ildə pandemiya dövründə aparılan yarılma zamanı koronavirus testi keçirilməyib və bu, metodoloji baxımdan ciddi çatışmazlıq olub. Onun sözlərinə görə, Maradonanın ölüm səbəbləri arasında COVID-19 ehtimalı da nəzərdən keçirilməli idi.

Mütəxəssis virusun bəzi hallarda xəstənin vəziyyətini çox sürətlə ağırlaşdıra bildiyini qeyd edib. Ferrari həmçinin Maradonanın ölümündən əvvəl uzun müddət əziyyət çəkdiyi ilə bağlı əvvəlki ekspert ifadələri ilə razılaşmayıb. Onun fikrincə, futbolçunun aqonal vəziyyəti bir neçə dəqiqə davam etmiş ola bilər.

Xatırladaq ki, Maradona 25 noyabr 2020-ci ildə 60 yaşında Buenos-Ayres əyalətinin Tiqre şəhərindəki evində ürək dayanması nəticəsində vəfat edib. O, ölümündən təxminən iki həftə əvvəl beynindəki subdural hematomaya görə əməliyyat olunmuşdu.

Hazırda onun ölümü ilə bağlı yeddi tibb işçisi məhkəmə qarşısındadır. Onlara ehtimal olunan qəsdlə adam öldürmə ittihamı irəli sürülüb. İş üzrə məhkəmə prosesi San İsidroda davam edir.