Ayxan Abbasov millinin əsas məqsədini açıqladı

Sabah Millətlər Liqasında ilk oyunumuza çıxacağıq. Rəqibimiz artıq ilk oyununu keçirib və Lixtenşteyni məğlub edib. Litvanın son 4 oyununa nəzər salsaq görərik ki, daha çox ənənəvi heyətlə mübarizə aparırlar. Bir çox futbolçuları Avropa klublarında çıxış edir. Son zamanlar yaxşı mənada inkişaf etdiklərini də müşahidə edirik.

Publika.az xəbər verir ki, bu sözləri futbol üzrə Azərbaycan milli komandasının baş məşqçisi Ayxan Abbasov UEFA Millətlər Liqasının D Divizionunda Litva yığmasına qarşı keçiriləcək oyundan öncə təşkil olunan mətbuat konfransında deyib.

Mütəxəssis matçla bağlı fikirlərini bölüşüb: Biz də yoldaşlıq oyunu keçirdik və həmin görüşdən fərqli olaraq, sabah futbolçularımızın daha yüksək templə oynamasını istəyirik. Rəqibin ilk dəqiqələrdən meydanda təzyiq göstərəcəyini bilirik. Komanda ümumilikdə oyuna hazırdır. Əsas məqsədimiz bu turnirdə birinci yeri tutmaqdır. Bilirik ki, Litva ilə şanslarımız bərabərdir. Onlar da bunun üçün mübarizə aparacaqlar. Qrupda üç komanda var və hər xal, hər vurulan və buraxılan qol vacib olacaq. Biz də buna hazır olmalıyıq”.

Azərbaycan millisinin hücumçusu Mahir Emreli də yaxşı nəticəyə ümid etdiklərini vurğulayıb: “Sabah bizi çox önəmli oyun gözləyir və biz bunun fərqindəyik. Yaxşı təşkil olunmuş komandaya qarşı mübarizə aparacağıq. Bu gün son məşq və iclasımızı keçirib oyuna hazırlaşacağıq. Ümid edirik ki, sabah oyuna tam hazır şəkildə çıxıb yaxşı nəticə qazanacağıq”.

Qeyd edək ki, sentyabrın 27-də “Dariaus ir Gireno” stadionunda keçiriləcək Litva-Azərbaycan oyunu Bakı vaxtı ilə saat 17:00-da başlayacaq.