“Arsenal” etiraf etdi: Yayda Vinisiusu transfer etmək istəyiblər

“Arsenal”ın baş məşqçisi Mikel Artetanın köməkçisi Migel Molina “Real Madrid”in hücumçusu Vinisius Juniorun 2026-cı ilin yay transfer dönəmində klubun transfer gündəmində olduğunu təsdiqləyib.

Publika.az xəbər verir ki, Molina İspaniyanın “La Tribu” radio proqramında çıxışı zamanı braziliyalı futbolçunun London klubunun müzakirə etdiyi namizədlərdən biri olduğunu açıqlayıb. Ona “Arsenal”ın Vinisiusla maraqlanıb-maraqlanmadığı barədə sual ünvanlanıb.

33 yaşlı mütəxəssis bu iddianı təsdiqləyərək deyib: “Əlbəttə. Reallığı inkar edə bilmərəm. O, masadakı adlardan biri idi”.

“Arsenal”ın məşqçilər heyətinin yayda Vinisiusu Şimali Londona gətirmək variantını nəzərdən keçirdiyi məlum olub. Lakin braziliyalı hücumçu karyerasını Madrid klubunda davam etdirməyə üstünlük verib və uzunmüddətli müqaviləyə razılıq verib.

Molina eyni zamanda Artetanın məşq prosesindəki yanaşmasından da danışıb. Onun sözlərinə görə, ispaniyalı çalışdırıcı klubda ən çox çalışan şəxslərdən biridir.

“İlk gələn odur, son gedən də. Çox gərgin işləyir və son dərəcə tələbkardır”, – Molina qeyd edib.

Artetanın əsas üstünlüklərindən birinin isə həm futbolçulardan, həm də məşqçilər heyətindən maksimum nəticə almaq bacarığı olduğu vurğulanıb. Molina hesab edir ki, baş məşqçinin öz işinə münasibəti komandadakı digər şəxslər üçün də nümunədir.