Borson: “Mançester Siti”ni çox ciddi cəza gözləyir

“Mançester Siti”nin maliyyə pozuntuları ilə bağlı işi klub üçün daha ciddi mərhələyə keçib.

Publika.az xəbər verir ki, klubun keçmiş maliyyə məsləhətçisi Stefan Borson “TalkSPORT”a açıqlamasında “Mançester Siti”nin Premyer Liqadan aşağı liqaya salınması da daxil olmaqla çox sərt cəzalarla üzləşə biləcəyini bildirib.

Premyer Liqa 2023-cü ilin fevralında “Mançester Siti”ni maliyyə qaydalarının pozulması ilə bağlı 115 maddə üzrə ittiham edib. Müstəqil komissiyanın dinləmələri 2024-cü ildə başa çatıb.

“Daily Mail”in məlumatına görə, komissiyanın qərarı artıq Premyer Liqa klublarına çatdırılıb və yaxın zamanda ictimaiyyətə açıqlanması gözlənilir. Yayılan məlumatlarda “Mançester Siti”nin 115 ittihamdan biri istisna olmaqla, demək olar ki, hamısı üzrə təqsirli bilindiyi iddia olunur.

2002-2007-ci illərdə “Mançester Siti”də maliyyə məsləhətçisi kimi çalışmış Borson mümkün cəzalar barədə danışarkən bildirib ki, hazırda hər şey mümkündür. Onun sözlərinə görə, klub üçün proses bundan sonra da uzun müddət davam edə bilər və cəzanın müəyyənləşdirilməsi ayrıca mərhələdə həyata keçiriləcək.

Borson qeyd edib ki, “Mançester Siti” bütün ittihamları əvvəldən rədd edib və buna görə qərarın klub üçün xüsusilə ağır nəticələri ola bilər. Keçmiş məsləhətçi klubun qərardan apellyasiya şikayəti verəcəyini gözlədiyini də bildirib. Lakin onun fikrincə, faktlarla bağlı qərarın apellyasiya mərhələsində dəyişdirilməsi ehtimalı çox aşağıdır.

Borson həmçinin “Mançester Siti”nin komissiyanın qərəzli olması və prosesin uzun çəkməsi ilə bağlı hüquqi arqumentlər irəli sürə biləcəyini istisna etməyib. Bununla belə, o, belə etirazların uğur qazanacağına dair ehtimalı aşağı qiymətləndirib.

Borsonun sözlərinə görə, yekunda “Mançester Siti”ni çox ciddi cəza gözləyə bilər.