Kvaratsxeliya Villi Sanyolla belə vidalaşdı

PSJ və Gürcüstan millisinin cinah yarımmüdafiəçisi Xviça Kvaratsxeliya Villi Sanyolun milli komandanın baş məşqçisi vəzifəsindən getməsinə reaksiya verib.

Publika.az xəbər verir ki, Xviça bununla bağlı sosial mediada paylaşım edib:

“Təşəkkür edirəm, Villi! Birlikdə çox şeydən keçdik və hər cür çətinliyin öhdəsindən gəldik. Komanda yoldaşlarımla birlikdə ölkəmizi Avropa Çempionatına çıxararaq uşaqlıq arzumuzu gerçəkləşdirdik. Buna birlikdə nail olduq və tarix yazdıq.

Gürcü xalqı ilə bölüşdüyümüz sevinc və həyəcan yaddaşımızda əbədi olaraq xüsusi bir şey kimi qalacaq. Bu vaxta və birlikdə keçirdiyimiz bütün illərə görə sizə xüsusi təşəkkür etmək istəyirəm. Bu futbol səyahətini heç vaxt unutmayacağıq.

Gələcəkdə sizə ən xoş arzularımı çatdırıram… Yenidən görüşəcəyik” .

Sanyol 2021-ci ilin fevral ayından bəri Gürcüstan milli komandasını çalışdırırdı. Onun rəhbərliyi altında gürcülər tarixlərində ilk dəfə olaraq Avro 2024-ün final mərhələsinə vəsiqə qazandılar və 1/8 finala yüksəldilər.

Publika.az