Formula 1 Afrikaya qayıdır: Ölkə və tarix bəllidir

Formula 1 37 ildən sonra Afrikadailk yarışını keçirə bilər.

Publika.az xəbər verir ki, “RacingNews365”in məlumatına görə, Qran Prinin Ruandada keçirilməsi qərarı artıq verilib və yarış 2030-cu ildə çempionat təqviminə əlavə edilə bilər.

Nəşrin paddokdakı mənbələrinə görə, razılıq əldə edilib və rəsmi açıqlamanın 2026-cı ilin sonuna qədər, ehtimal ki, yaxın həftələrdə verilməsi gözlənilir. Ruanda prezidenti Paul Kaqame son illərdə ölkəsində Formula 1 tədbirinin keçirilməsini təmin etmək üçün səylər göstərir.

Məlumata görə, Ruanda Kiqalidən təxminən 40 kilometr aralıda, Buqesera Beynəlxalq Hava Limanı yaxınlığında daimi yarış yolu tikməyi planlaşdırır. Layihəni keçmiş Formula 1 pilotu Aleksandr Vurts tərəfindən təsis edilmiş “WurzDesign” şirkəti hazırlayıb.

Şirkət hazırda Səudiyyə Ərəbistanındakı Qiddiya Sürət Parkı yolunda “Tilke Engineering” ilə əməkdaşlıq edir.

Formula 1 Afrikada sonuncu dəfə 1993-cü ildə Cənubi Afrika Qran Prisi Kyalami trasında keçirilmişdi. Son illərdə trasa qayıtmaq imkanı Kyalami və Keyptaunun yarışa ev sahibliyi etmək üçün namizəd olduğu Cənubi Afrikada, eləcə də Mərakeş və Nigeriyada da müzakirə olunub.

Publika.az