PSJ-nin ulduz qapıçısı aliment qaydalarından narazıdır

Rusiya Konstitusiya Məhkəməsi PSJ-nin qapıçısı Matvey Safonovun aliment ödənişi ilə bağlı şikayətinə baxıb.

Publika.az xəbər verir ki, “RİA Novosti”yə istinadla xəbər verir ki, məhkəmə sənədlərinə görə, Safonov Rusiya Ailə Məcəlləsinin 81-ci maddəsinin 1-ci hissəsinin konstitusiyaya uyğunluğunu şübhə altına alıb. Bu maddəyə əsasən, aliment ödənişləri ödəyicinin gəlirinin müəyyən faizini təşkil edir. 2022-ci ilin yanvar ayından etibarən futbolçu əmək haqqının və ya digər gəlirinin dörddə birinə bərabər miqdarda aliment ödəməli olub. 27 yaşlı futbolçunun Anastasiya Kazaçeklə ilk evliliyindən bir qızı var. Ötən ilin iyun ayında Safonov 3,5 illik aliment borcunu, yəni 64 milyon rublu tam ödəyib və aliment ödənişlərinin ümumi məbləği hazırda 90 milyon rublu keçib.

Safonovun sözlərinə görə, Ailə Məcəlləsinin bu müddəası, aliment ödənişləri barədə razılaşma olmadığı təqdirdə, uşağın faktiki ehtiyacları nəzərə alınmaqla sabit pul məbləğinin müəyyən edilməsinə mane olur.

Dinləmələr zamanı Rusiya Federasiyası Konstitusiya Məhkəməsi qarşısında dövlət orqanlarının bir neçə səlahiyyətli nümayəndəsi Ailə Məcəlləsinin mübahisəli müddəasının konstitusiyaya uyğun olduğu barədə fikirlərini bildiriblər. “Biz hesab edirik ki, Ailə Məcəlləsinin 81-ci maddəsinin mübahisəli 1-ci bəndi konstitusiyaya zidd deyil… Eyni zamanda, qanunvericilik yetkinlik yaşına çatmayan uşaqlar və onların valideynləri arasında aliment tənzimləmələri çərçivəsində maraqların balansını təmin etmək mexanizmlərini kifayət qədər müəyyən edir”, – deyə Rusiya Federasiyası Prezidentinin Konstitusiya Məhkəməsindəki Səlahiyyətli Nümayəndəsi Dmitri Mezentsev bildirib.

Rusiya Federasiyası Konstitusiya Məhkəməsində Federasiya Şurasının səlahiyyətli nümayəndəsi Andrey Klişas da oxşar mövqe bildirib. Onun fikrincə, ərizəçi ümumi yurisdiksiya məhkəməsində alimentin sabit məbləğ kimi təyin edilməsinin məqsədəuyğunluğunu əsaslandırmalı idi, buna heç bir qanunvericilik maneəsi yoxdur.

Publika.az