Mbappe korrupsiya işi üzrə polisə ifadə verib? - 60 min avro iddiası

“Real Madrid”in ulduz futbolçusu Kilian Mbappenin Fransa futbolunda korrupsiya iddiaları ilə bağlı aparılan araşdırma çərçivəsində polis tərəfindən dindirildiyi bildirilir.

Publika.az xəbər verir ki, Fransanın “L’Équipe” nəşrinin məlumatına görə, araşdırma birbaşa Mbappeyə qarşı deyil, Fransa millisinin uzun illər təhlükəsizlik xidmətinin rəhbəri olmuş Məhəmməd “Momo” Sanhadji ilə bağlıdır. O, 2004–2026-cı illərdə bu vəzifəni icra edib.

Məlumata əsasən, Mbappenin sentyabrın 30-da istintaq çərçivəsində ifadəsi alınıb. Sanhadji müxtəlif iddialarla üzləşib. Onun viza müraciətlərinin təsdiqlənməsi prosesində nüfuzundan istifadə etdiyi, Mbappenin Kameruna şəxsi səfəri zamanı onu müşayiət etdiyi və dövlət qulluqçusu statusunu saxladığı halda futbolçunun təhlükəsizliyini təmin etdiyi iddia olunur.

Bundan başqa, Mbappenin 2023-cü ildə Sanhadjiyə 60 min avrodan çox pul ödədiyi də irəli sürülür. Nəşrin yazdığına görə, Sanhadji ev alqı-satqısını maliyyələşdirmək məqsədilə bir sıra Fransa millisinin futbolçularından şəxsi borc da alıb.

Araşdırma çərçivəsində sabiq “Bavariya” futbolçusu Frank Riberinin də adı hallanır. Onun Sanhadjiyə Siciliyada istirahət hədiyyə etdiyi üçün istintaq materiallarında yer aldığı bildirilir.

Qeyd edək ki, bütün bunlar mətbuatda yayılan iddialardır və araşdırmanın Mbappeyə qarşı aparıldığı anlamına gəlmir.