Futbolçular qəzaya düşdülər: "Polimer"in hücumçusu öldü

Barnaulun "Polimer" klubunun futbolçusu 24 yaşlı Daniil Vinter avtomobil qəzasında həlak olub.

Publika.az xəbər verir ki, bu barədə klub "VKontakte"dəki rəsmi səhifəsində məlumat yayıb.

Yerli medianın məlumatına görə, qəza 15 oktyabrda Troitskoye yaxınlığındakı Çuyski traktında baş verib. Vinter komanda yoldaşı Yeqor Parşakovla birlikdə Biyskdən Barnaula qayıdırmış. Maşın sürüşkən yolda idarəetmədən çıxıb və sonda səkiyə çırpılıb.

Avtomobili idarə edən Vinter başından ağır xəsarət alıb və ölüb. Parşakov isə ciddi xəsarət almayıb.

Barnaul Futbol Federasiyası da məlumat yayıb və "Polimer" klubuna, bütün futbol ictimaiyyətinə, mərhum idmançının ailəsinə və dostlarına başsağlığı verib.

Qeyd edək ki, Vinter 2002-ci ildə anadan olub və "Dinamo Barnaul"un gənclər komandasından yetişib. O, bu illər ərzində "Dinamo Barnaul"da, eləcə də "Torpedo Miass", "Nosta Novotroitsk" və "Polimer"də hücumçu kimi oynayıb. Vinter "Polimer"lə birlikdə 2023-cü ildə Sibir çempionluğunu qazanıb.

Müəllif: Tural