Fransada iğtişaş: Məşhur klubun mağazası talan edildi

“Marsel” futbol klubunun rəsmi mağazası talançıların törətdiyi qarət səbəbindən müvəqqəti olaraq bağlanıb.

Publika.az xəbər verir ki, bu barədə komandanın mətbuat xidməti məlumat yayıb.

“İiğtişaşlar zamanı xeyli maddi ziyan dəyib. “Marsel” zorakılıq aktlarını qətiyyətlə pisləyir və mağazanı idarə edən tərəfdaşı “Puma” ilə həmrəyliyini bildirir. Azarkeşlər klubun şəhərdəki digər rəsmi pərakəndə satış məntəqələrini ziyarət edə bilərlər”, – məlumatda deyilir.

Hadisə Fransada geniş yayılmış etirazlar fonunda baş verib: Parisdə və digər şəhərlərdə yanacaq qiymətlərinin artmasına və alıcılıq qabiliyyətinin azalmasına qarşı nümayişlər keçirilir. Təşkilatçıların məlumatına görə, etirazlarda təxminən 800.000 nəfər iştirak edib; Daxili İşlər Nazirliyinin məlumatına görə, iştirakçıların sayı 550.000 nəfər olub. Bir neçə şəhərdə dinc etirazlar polislə toqquşmalara və iğtişaşlara çevrilib. Daxili işlər naziri Loran Nunyes 2000-dən çox insanın həbs olunduğunu bildirib və hakimiyyət orqanlarının iğtişaşlarda və talanlarda iştirak edənləri təqib etməyə davam etmək niyyətində olduğunu bildirib.

Müəllif: Tural