“Bayern” 30 milyona adığı Saşa Boeydən canını qurtarmaq istəyir

“Bayern Münhen” qış transfer pəncərəsində fransalı müdafiəçi Saşa Boeyi satmaq istəyir. Futbolçu ilə “Paris FC” klubunun maraqlandığı bildirilir. Onun mümkün transferi “Qalatasaray” üçün də maliyyə baxımından sərfəli ola bilər.

Publika.az xəbər verir ki, bu barədə Türkiyənin “Fotospor” nəşri məlumat yayıb.

Xatırladaq ki, “Qalatasaray” 2024-cü ilin qışında Saşa Boeyi 30 milyon avro qarşılığında “Bayern Münhen”ə satıb. Tərəflər arasında 2028-ci il iyunun 30-dək müqavilə imzalanıb. Lakin 26 yaşlı futbolçunun Almaniyadakı çıxışı zədələr və qeyri-sabit performansla yadda qalıb.

Boey ötən mövsümün qış fasiləsində satınalma şərti ilə yenidən “Qalatasaray”a icarəyə verilsə də, İstanbul klubu bu imkandan yararlanmayıb. Hazırda müdafiəçinin Münhen təmsilçisinin transfer siyahısında olduğu və klubun onun satışına və ya icarəyə verilməsinə mane olmayacağı qeyd edilir.

Məlumata görə, Fransa Liqa 1-də çıxış edən “Paris FC” futbolçu ilə bağlı danışıqlara başlamağa hazırlaşır. “Qalatasaray”ın Boey üçün yenidən addım atıb-atmayacağı isə hələlik bəlli deyil.

Transfer baş tutarsa, İstanbul klubunun hesabına əlavə 5 milyon avro daxil ola bilər. Belə ki, Boeyin “Bayern Münhen”ə keçidi zamanı müqaviləyə şərti bonuslarla bağlı xüsusi bənd əlavə edilib. Həmin razılaşmaya əsasən, futbolçu başqa kluba keçəcəyi təqdirdə Almaniya təmsilçisi “Qalatasaray”a ödənilməmiş 5 milyon avroluq bonusu verməlidir.

Nəşrin yazdığına görə, Boeyin yeni kluba cüzi məbləğ qarşılığında transfer olunması belə bu ödənişin həyata keçirilməsinə səbəb ola bilər. Bununla belə, mümkün keçidin detalları və bonus şərtinin tətbiqi ilə bağlı rəsmi açıqlama verilməyib.