ABŞ Qran Prisi təhlükədə - Məhkəmə iddiası qaldırıldı

Formula 1 ABŞ Qran Prisi yanacaq sərfiyyatı ölçən təchizatçıları arasında baş verən məhkəmə çəkişməsi səbəbindən problemlərlə üzləşə bilər.

Publika.az xəbər verir ki, bu barədə “Formula1.it” məlumat yayıb.

Bildirilir ki, Britaniya şirkəti “Sentronics Holdings”, 2026-cı ildən 2030-cu ilə qədər bu cihazların tədarükü üçün eksklüziv FIA müqaviləsi almış “Allengra”ya qarşı məhkəmə iddiası qaldırıb.

Mənbənin məlumatına görə, “Sentronics” Almaniya-Rumıniya şirkətini ABŞ-da qeydiyyatdan keçmiş Britaniya patenti ilə qorunan texnologiyadan istifadə etməkdə ittiham edir.

İddiaçı hesab edir ki, FIA-ya da iddia edilən pozuntu barədə məlumat verilib. İddia 16 oktyabrda ABŞ Qran Prisinin bu həftə sonu keçiriləcək Ostindəki Texas Qərb Dairəsi Federal Rayon Məhkəməsində qaldırılıb. “Sentronics” maliyyə kompensasiyası və ABŞ-da “Allengra” məhsullarına qarşı qadağa tələb edir.

Bu cihazlar avtomobillərin güc aqreqatlarına verilən yanacağın miqdarına nəzarət etmək və texniki qaydalara uyğunluğunu yoxlamaq üçün lazımdır. Məhkəmə onların istifadəsini dərhal qadağan edən qərar çıxararsa, FIA yarış həftəsonu ərzində texniki yoxlamalar aparmaqda çətinliklərlə üzləşə bilər.

“Allengra” cihazlarının istifadəsini qadağan edən məhkəmə qərarı ilə bağlı hələlik heç bir məlumat yoxdur. Məhkəmə iddiasının qaldırılması faktı axın ölçən cihazların istifadəsini avtomatik olaraq qadağan etmir və ya ABŞ Qran Prisini ləğv etmir. İddianın mövcudluğu ABŞ federal qeydlərində təsdiqlənir. İş Texasın Qərb Dairəsi üzrə ABŞ Rayon Məhkəməsində qaldırılıb. Məhkəmə prosesinin FIA və ABŞ Qran Prisi üçün dərhal nəticələrə səbəb olub-olmayacağı hələlik məlum deyil.

Publika.az