Diz bağları qırılan Kvaratsxeliya kövrəldi, Dembele dəstək verdi

Fransanın PSJ klubunun gürcü futbolçusu Xviça Kvaratsxeliya diz bağlarının qırılması səbəbindən uzun müddət yaşıl meydanlardan kənarda qalacaq. Paris təmsilçisi UEFA Çempionlar Liqasında “Barselona”nı 4:2 hesabı ilə məğlub etsə də, qarşılaşma komanda üçün ciddi itkilərlə yadda qalıb.

Publika.az xəbər verir ki, “Goal” nəşrinin məlumatına görə, Kvaratsxeliya matçın təxminən 60-cı dəqiqəsində “Barselona”nın futbolçusu Xavi Espartla mübarizə zamanı dizindən zədə alıb. Gürcüstan millisinin üzvü meydanı müstəqil şəkildə tərk edə bilməyib və paltardəyişmə otağına gedərkən köməyə ehtiyac duyub. Klub futbolçunun çarpaz bağının qırıldığını təsdiqləyib.

Kvaratsxeliya sosial şəbəkədə paylaşım edərək yaşadığı məyusluğu ifadə edib. O, qarşılaşmaya əvvəlkindən daha yaxşı hazırlaşdığını, lakin belə bir zədəni gözləmədiyini bildirib. Futbolçu qarşıdakı ayları ağrı və göz yaşları içində olsa belə, bərpa prosesinə həsr etməyə hazır olduğunu vurğulayıb.

“Niyə məhz mən? Heç nəyi təsadüfə buraxmamışdım. Bu matça, yəqin ki, indiyə qədər heç vaxt olmadığım qədər yaxşı hazırlaşmışdım. Hər şeyə hazır olduğumu düşünürdüm, amma buna yox”, deyə Kvaratsxelia gürcü dilində yazıb. O, “Instagram” paylaşımına əlavə edib ki, qarşıdakı ayları ağrılar və göz yaşları içində, çalışaraq keçirməyə hazırdır.

PSJ-nin fransalı hücumçusu Usman Dembele Kvaratsxeliyaya dəstək mesajı göndərib. Dembele “Instagram” hesabında komanda yoldaşına dəstək nümayiş etdirərək “Güclü ol, Kvara” mesajını paylaşıb.