Dünya çempionatı: Bu ölkə də Rusiya ilə oynamaqdan imtina etdi

İsveçrə Xokkey Assosiasiyası ölkənin 20 yaşadək xokkeyçilərdən ibarət milli komandasının Ukraynadakı müharibə səbəbindən 2027-ci il dünya çempionatında Rusiya ilə oyun keçirməyəcəyini açıqlayıb.

Publika.az xəbər verir ki, bu barədə təşkilatın mətbuat xidməti məlumat yayıb.

“5 noyabr 2026-cı il, cümə axşamı günü bildirildiyi kimi, İsveçrə Xokkey Assosiasiyası əvvəlcə Beynəlxalq Xokkey Federasiyasının (IIHF) əlavə qərarlarını gözləmək qərarına gəldi.

IIHF CAS qərarının tətbiqi üçün ilk addımlara başladığı üçün vəziyyət cari hadisələr nəzərə alınmaqla hərtərəfli şəkildə yenidən qiymətləndirilib. İsveçrə Xokkey Assosiasiyasının müvafiq qurumları ilə yanaşı, İsveçrə xokkeyindən də maraqlı tərəflər bu prosesə cəlb olunublar.

Bu əsasda, İsveçrə Xokkey Assosiasiyasının Direktorlar Şurası Ukraynada davam edən münaqişə və mövcud vəziyyəti nəzərə alaraq, İsveçrənin 20 yaşadək xokkeyçilərdən ibarət milli komandasının qarşıdan gələn Dünya Çempionatında Rusiya ilə oynamayacağına qərar verib”, – deyə bəyanatda bildirilir.

Eyni zamanda, bəyanatda qeyd olunur ki, bu, Dünya Gənclər Çempionatında iştirakdan imtina deyil, sadəcə turnirdə Rusiya millisi ilə oynamamaq qərarıdır:

“Bu qərar qəti şəkildə Dünya Çempionatında iştirakdan imtina ilə eyniləşdirilməməlidir.

İsveçrə millisi Edmontonda keçiriləcək turnirdə iştirak etmək niyyətindədir. Qərar yalnız Rusiya ilə oyunla bağlıdır”.

Qeyd etmək lazımdır ki, Kanada 2027-ci il Dünya Gənclər Çempionatına ev sahibliyi edəcək, lakin Baş nazir Mark Karni bu yaxınlarda ölkəsinin Rusiyanın turnirdə iştirakına icazə verməyəcəyini açıqladı. Yarış 26 dekabr 2026-cı ildən 5 yanvar 2027-ci ilə qədər keçiriləcək.