“İlin idman şəxsiyyəti”: 9 mükafatdan 5-ni tamaşaçılar seçəcək

BBC-nin ənənəvi “Sports Personality of the Year” mükafatlandırma mərasimi dekabrın 13-də keçiriləcək. Bu il təqdim olunacaq 9 mükafatdan 5-nin qalibi tamaşaçıların səsverməsi ilə müəyyənləşəcək.

Publika.az xəbər verir ki, mərasim İngiltərənin Salford şəhərində təşkil olunacaq və Bakı vaxtı ilə saat 21:45-dən etibarən BBC One, BBC iPlayer və BBC Sport platformalarında canlı yayımlanacaq.

Proqramın aparıcıları bu dəfə də Kler Boldinq, Qabbi Loqan və Aleks Skott olacaq.

2026-cı il mərasimində idman sahəsində baş verən mühüm hadisələr, o cümlədən Böyük Britaniya yığmasının Qış Olimpiya Oyunlarında ən uğurlu çıxışı, İngiltərə millisinin 1966-cı ildən bəri dünya çempionatlarında kişilər arasında ən yaxşı nəticəsi və Avropa Atletika Çempionatındakı rekord göstəricilər diqqət mərkəzində olacaq.

Bu il mükafatlandırma proqramına iki yeni nominasiya da əlavə edilib: “İlin kişi futbolçusu” və “BBC Dünya Xidməti üzrə ilin qadın futbolçusu”. Sonuncu mükafat 2015-ci ildən təqdim edilsə də, ilk dəfə “Sports Personality of the Year” mərasiminin tərkibində veriləcək. Bu nominasiya üzrə beynəlxalq səsvermə noyabrın 10-da başlayacaq.

Qalibləri tamaşaçılar tərəfindən müəyyənləşdiriləcək beş nominasiya isə “İlin idman şəxsiyyəti”, “İlin komandası”, “İlin dünya idman ulduzu”, “İlin kişi futbolçusu” və “İlin qadın futbolçusu” olacaq.

Digər mükafatlar üzrə qaliblər ekspertlərdən, idman jurnalistlərindən və keçmiş idmançılardan ibarət müstəqil heyət tərəfindən seçiləcək.

Ümumilikdə mərasimdə 9 nominasiya üzrə mükafat təqdim olunacaq. Bunlara həmçinin “Helen Rollason” mükafatı, “İlin gənc idman şəxsiyyəti”, “İlin məşqçisi” və “Ömürlük nailiyyət” mükafatları daxildir.