Azərbaycanda yetişən bu bitki qızılı geridə qoyur... - Əkən zəngin olur

Zəfəran elə bitkilərdəndir ki, adı çəkilən kimi bahalılıqla assosiasiya olunur. Çəkisinə görə qızılla müqayisə edilməsinin səbəbi isə təkcə qiyməti deyil, arxasında dayanan böyük zəhmətdir. Maraqlıdır ki, bu qiymətli bitki Azərbaycanda da yetişdirilir.

Publika.az "Yeni Sabah"a istinadən xəbər verir ki, zəfəran çiçəyi zahirən sadə görünsə də, onun dəyəri çiçəyin içində gizlənən cəmi üç qırmızı lifdədir. Həmin liflər yalnız əl ilə yığılır və bir kiloqram hazır məhsul üçün yüz minlərlə çiçək toplamaq lazım gəlir. Məhz bu səbəbdən zəfəran dünyada ən bahalı ədviyyatlardan biri hesab olunur.

Bu bitkinin təsiri miqdarı ilə ölçülmür, çox az istifadə olunsa belə, verdiyi rəng və aroma dərhal hiss olunur. Elə buna görə də beynəlxalq bazarlarda zəfəranın qiyməti minlərlə, hətta on minlərlə dollar səviyyəsində dəyişir.

Zəfəran yalnız mətbəxlə məhdudlaşmır. Onun insan orqanizminə müsbət təsirləri, ruh halını yaxşılaşdırması və bərpaedici xüsusiyyətləri uzun illərdir diqqət mərkəzindədir. Bundan başqa, dəriyə qulluq məhsullarında və yüksək səviyyəli restoranların xüsusi yeməklərində də istifadə olunur.