Təki hər il "Çelsi"dən qol yeyək
Bizi izləyin

Köşə

Təki hər il "Çelsi"dən qol yeyək

Aqil Lətifov

Ötən gecə “Qarabağ” bizə - bütün azarkeşlərə, futbol ictimaiyyətinə yenə və yeni ilklər yaşatdı. Yaşadığımız hər şey sözün tam anlamında ilk idi. Həm biz, həm Qurban Qurbanov, həm komandamızın oyunçuları, həm də jurnalistlər ilk dəfə olaraq bir klubumuzun Çempionlar Liqasındakı oyununun həyəcanını yaşadı. “Qarabağ” məhz bu ilkin həyəcanında boğuldu və ali liqada 6 qol buraxmaqla da adını tarixə qızıl hərflərlə yazdırdı. Yoxsa əsl “Qarabağ” bu deyildi və ən azında belə səhvlərlə 6 qol buraxmazdı.

İnanın, “Qarabağ”ın böyükhesablı məğlubiyyətinə heç üzülmədim. Çünki buralarda futbolun səviyyəsi tam fərqlidir. Məhz belə komandaların qarşılaşmalarında o fərq çılpaqlığı ilə gözlər önünə sərilir. Bura o liqadır ki, ən güclü komandalar belə bir-birnə 5-6 top fərqi ilə qalib gəlməkdə çətinlik çəkmir. Odur ki, 6 topa üzülmək yerinə “Qarabağ”ın bəzi komandalar kimi qorxub arxada oturmamasına, cəsur oyununa, futbol oynamağa çalışmasına sevinmək lazımdır. Şübhəsiz ki, bu, gələcək adına ümidvericidir.

Amma pis olmadım desəm, yanlış olar. Çünki “Qarabağ”ın buraxdığı 6 qol bunlar olmamalı idi. Bütün qollar məhz yanlış seçim, yanlış mövqe nəticəsində qapımıza vuruldu. Demək ki, bu səviyyələrdəki matçlar üçün tam fərqli şəkildə hazırlıqlı olmaq lazımdır.

Sözün açığı, “Qarabağ”ın minimum 5, maksimum 8 qol buraxacağını gözləyirdim. Çünki ora tam başqa bir arena, elit səviyyədir. Və orada ani diqqətsizliyə, ləngliyə, gec düşünməyə o dəqiqə cəza kəsirlər. Necə ki, “Qarabağ”ın bütün qolları məhz bu diqqətsizliyinin, gec düşünməsinin, yanlış seçimlər etməsinin nəticəsində yarandı. Buna bir sözüm yox, çünki bütün bunlar oralarda oynanmadan, saysız-hesabsız qol buraxmadan düzələcək şeylər deyil. Davamlı olaraq o səviyyələrdə oynmalısan ki, qismən də olsa, böyük komandaların yanında çox cılız görünməyəsən. Dünənki “Qarabağ” kimi...

Bəli, indiyədək oynadığı oyunlarda “Qarabağ” bizə çox böyük görünürdü, amma dünən gördük ki, komandamızın böyüməsi üçün hələ qət edəcək yolu çoxdur. Səviyyə fərqi, ali liqada oynamağın tam başqa bir dünya olduğunu aşkar şəkildə bir daha gördük. Amma qəti üzülməyə dəyməz. Çünki “Qarabağ” düz yoldadır və bu gedişlə bizə hələ çox ilklər yaşadacaq.

Şübhəsiz ki, böyüklərdən təpik, şillə, yumruq yemədən heç vaxt böyüyə bilməzsən. Əgər böyük komanda olmaq istəyirsənsə, buna hazır olmalı, gördüklərindən, yediklərindən nəticə çıxarmalısan. Necə ki, qardaş türk komandaları bu yolla böyüyüb Avropada söz sahibi oldu. “Qalatsaray” məhz illər öncə “Çelsi”yə 5-0 uduzduqdan sonra Avropanın ən böyüyü olaraq, köklü komandaları bir-bir diz çökdürdü. Necə ki, “Qarabağ” artıq bu yolda irəliləyir. Daha öncə “Tvente”lərə, uduzan komandamız artıq, “Çelsi”lərlə, “Roma”larla bərabər meydanı paylaşır. Əgər əvvələr komandalarımız Lüksemburq, Norveç, İsveç, Yunanıstan kimi ölkələrin klublarından 5 yeyirdilərsə, indi bu adlar İngiltərə, İtaliya, İspaniya, Almaniya ilə əvəzlənib. Əslində fərq burada yatır. Yəni komandamız artıq ən güclülərlə başa-baş getməyə can atır. Məhz mən hər il komandamızın “Çelsi”lərdən, “Barselona”lardan qol buraxmasını istəyirəm. Çünki inkişafımız oradadır...

Qəti ruhdan düşmək olmaz və bu yolda indiyədək olduğu kimi əzmlə davam etmək lazımdır. İnanıram ki, növbəti oyunlarda “Qarabağ” ilk oyunun həyəcanını üzərində ataraq Azərbaycanı layiqlə təmsil edəcək.

Təşəkkürlər “Qarabağ” bizə bu sevinci, ilkləri yaşatdığın üçün.

Oxumağa davam et
Reklam
Reklam

Gündəm