Magazin1

Emin Ağalarovun konsertində anşlaq - FOTOLAR

21 Dekabr 2015 12:45

Emin Ağalarov Bakı pərəstişkarlarını sevindirib.

Publika.az xəbər verir ki, dünən Emin Ağalarovun Heydər Əliyev adına sarayda çoxdan gözlənilən “BOOMERANG” adlı konserti baş tutub.

Həmin gün Heydər Əliyev adına Sarayda Emin öz solo konserti ilə zalı, demək olar ki, "partladıb"! Onun qaynar trekləri və konsertə toplaşanların təkrarolunmaz energetikası bu axşamı daha da unudulmaz edib.

Müğənni öz gözəl ifası və möhtəşəm səhnə dekorasiyası ilə insanları heyran edib.

İfaçı Heydər Əliyev adına Sarayın səhnəsində sevilən hitləri ilə yanaşı, yeni "Yıxılaraq 8" adlı albomundan da bir neçə mahnı səsləndirib. Bütün konsert boyu zalda gözəl ab-hava hökm sürüb və ümumi şadyanalıq fonunda, konsert zalında sayrışan işıqların altında bayramsayağı əhval hiss olunub.

“BOOMERANG” sinqlını ifa edəndən sonra Emin pərəstişkarları ilə böyük məmnuniyyətlə şəkil çəkdirib, avtoqraf paylayıb. Ümumilikdə konsert anşlaqla keçib, tamaşaçılar Emini ayaqüstə alqışlarla yola salıb.

Xatırladaq ki, “BOOMERANG” adlı konsert proqramı ilə müğənni artıq Moskva və Sankt-Peterburq şəhərlərində çıxış edib. Qarşıda isə bizi daha bir konsert gözləyir. Belə ki, Emin Ağalarov 22 dekabr tarixində Heydər Əliyev adına sarayda daha bir konsert verəcək.

Qeyd edək ki, ifaçının qış, daha dəqiq desək, dekabr konsertləri artıq ənənəvi hal alıb.

Aytən