Ev dustağı olan Rəqsanə necə konsert verəcək? - Hüquqşünas detalları açıqladı

Bir neçə gün əvvəl ev dustaqlığına buraxılan Rəqsanə İsmayılova solo konsert verməyə hazırlaşır. Müğənni dekabrın 16-da paytaxtdakı restoranlardan birində səhnəyə çıxacaq.

Bununla bağlı Publika.az müğənninin qızı Aysun İsmayılovanın meneceri ilə əlaqə saxladı. Menecer məlumatı təsdiqləyərək Rəqsanənin həqiqətən konsert verəcəyini və qızı Aysun xanımın da konsertdə qonaq qismində iştirak edəcəyini təsdiqlədi.

Maraqlıdır, ev dustaqlığında olan bir şəxs restoran və ya hər hansı tədbirdə iştirak edə, ümumiyyətlə konsert verə bilər?

Məsələ ilə bağlı hüquqşünas Ramil Süleymanov Publika.az-a açıqlamasında bunu belə izah etdi:

“Rəqsanə xanım müğənnidir. Onun faktiki qazancı və gəliri ifaçılıqla bağlıdır. Bu səbəbdən onun konsert verməsində hər hansı problem görmürəm”.

Ev dustaqlığının şərtlərinə toxunan hüquqşünas bildirdi ki, "bu növ cəza alan şəxs yalnız evdə olmalıdır, evdən çıxmamalıdır", - deyə bir tələb yoxdur:

“Əgər məhkəmə təqsirləndirilən şəxsin üzərinə əlavə məhdudiyyətlər qoymayıbsa, o, sərbəst şəkildə konsert verə bilər. Yalnız şəxsin üzərində daşıdığı elektron qolbağa dair tələblərə əməl etmək və onu daim üzərində saxlamaq həmin şəxsin məsuliyyətlərindən biridir. Məhkəmə müəyyən edə bilər ki, şəxs konkret ərazi hüdudlarını tərk etməsin. Məsələn, onun qeydiyyat ünvanı Bakı şəhəridirsə, paytaxtdan kənara çıxmamalıdır. Eyni zamanda şəxsin üzərində daşıdığı elektron qolbaq da onun məsuliyyətlərindən biridir və buna əməl etməlidir”.

Gülnar Süleymanova