Qalmaqallı müsabiqədə sular durulmaq bilmir: 28 yaşlı gözəl tacından imtina etdi - FOTO

"Miss Estoniya 2025"in qalibi Brigitta Şabak tacından imtina edib.

Publika.az xəbər verir ki, bu barədə "People" məlumat yayıb.

28 yaşlı gözəl bərabərlik və qadınların güclənməsi üçün çalışdığını və "Miss Estoniya" ilə əlaqəsi olmadan bu işi müstəqil şəkildə davam etdirmək niyyətində olduğunu söyləyib.

Şabak qeyd edib ki, onun şəxsi dəyərləri milli müsabiqənin direktoru Natali Korneyçikin dəyərlərindən fərqlənir.

Təşkilatçılar isə onun qərarının heç bir şəxsi münaqişə ilə əlaqəli olmadığını vurğulayıblar. Onlar deyirlər ki, Korneyçik Şabakın "Miss Universe" müsabiqəsində iştirakını təmin etmək üçün əlindən gələni edib.

Təşkilatçılar, həmçinin gənc qadının müsabiqə ilə bağlı mənfi şərhlərinin yersiz və imzaladığı müqaviləyə zidd olduğunu da diqqətə çatdırıblar.

Qeyd edək ki, "Kainat Gözəli" gözəllik müsabiqəsi noyabr ayında Taylandda keçirilib. 74-cü dəfə keçirilən müsabiqə bəlkə də əvvəllər heç vaxt bu qədər xoşagəlməz sürprizlər və səs-küylü qalmaqallarla yadda qalmamışdı. Əsas qalmaqal finaldan sonra baş verib: keçmiş münsif üzvü və bəstəkar Omar Arfuş 25 yaşlı meksikalı Fatima Boş Fernandezin qələbəsinin saxta olduğunu iddia edib.

Ləman