Corcina məşhur kanaldan təzminat alacaq

Madrid məhkəməsi “Telemadrid” telekanalına qarşı açılan iş üzrə Corcina Rodriges və onun bacısı İvananın xeyrinə qərar verib.

Publika.az xəbər veri ki, “Revista HOLA”nın məlumatına görə, telekanal şəxsi həyatın toxunulmazlığını pozduğuna görə 150 min dollar məbləğində təzminat ödəməyə məcbur edilib.

Söhbət 2018-ci ildə yayımlanan əyləncə proqramından gedir. Həmin verilişdə heç bir sübut təqdim olunmadan Corcinanın uşaqlıq dövrü müzakirə edilib, ailəsinin həyatına dair detallər ictimailəşdirilib, arxiv fotolar nümayiş olunub və “gizli keçmiş”lə bağlı eyhamlar səsləndirilib.

Məhkəmə müəyyən edib ki, bu material jurnalist araşdırması xarakteri daşımayıb, əsassız şəkildə şəxsi həyata müdaxilə edilib. Qeyd olunub ki, həmin dövrdə Corcina Rodriges hələ dünya miqyasında tanınmış şəxs olmayıb, ailəsi isə ictimai statusa malik deyildi. Bu səbəbdən mövzunun bu formada mediada təqdim edilməsi yolverilməz sayılıb.

Qərarda o da vurğulanıb ki, proqram Corcinanın atasının vəfatından qısa müddət əvvəl efirə gedib ki, bu da ona vurulan mənəvi zərəri daha da artırıb.

Maraqlı məqam ondan ibarətdir ki, Corcina Rodriges məhkəmədə qələbə qazandığını Dubayda olarkən, “Globe Soccer Awards 2025” mərasimi zamanı öyrənib. Həmin tədbirdə Kriştiano Ronaldo Yaxın Şərqin ən yaxşı futbolçusu mükafatına layiq görülüb.